Ayanda Dlodlo

Ayanda Dlodlo
Tona wa ditirelo tsa setshaba le tsamaiso
In office Phatwe a le malatsi a matlhano ngwaga wa 2021 – Moranang a le malatsi a mane ngwaga wa 2022
Pele Ga Gagwe	Senzo Mchunu (a tshwareletse)
Morago Ga Gagwe	Thulas Nxesi
Tona wa tshireletso ya setshaba
In office Motsheganong a le masome mararo ngwaga wa 2019 – Phatwe a le malatsi a matlhano ngwaga wa 2021
Pele Ga Gagwe	Dipuo Letsatsi-Duba
Tona wa tsa selegae
In office Phalane a le lesome le bosupa ngwaga wa 2017 – Tlhakole a le masome mabedi le borobabobedi ngwbaga wa 2018
Pele Ga Gagwe	Hlengiwe Mkhize
Morago Ga Gagwe	Malusi Gigaba
Tona wa ditlhaeletsanyo
In office Mopitlo a le masome mararo le motso ngwaga wa 2017 – Phalane a le lesome le bosupa ngwaga wa 2017
Pele Ga Gagwe	Faith Muthambi
Morago Ga Gagwe	Mmamoloko Kubayi-Ngubane
Ka Ga Ena
O tsetswe	Motsheganong a le masome mabedi le bobedi ngwaga wa 1963 Aforika Borwa
Mokgatlho	African National Congress

Ayanda Dlodlo (o o tshotsweng ka Motsheganong a le masome mabedi le bobedi ngwaga wa 1963) ke mopolotiki le tona wa pele wa Aforika Borwa. Ke leloko la pele la Umkhonto we Siswe, o nnile mopalamente wa African National Congress (ANC) ka 2009. Morago, o ne a thapiwa go nna tona wa ditlhaeletsanyo (ka 2017), tona wa tsa magae (2017 go tsena 2018), tona wa ditirelo tsa setshaba le tsamaiso ya tsone (2018 go tsena 2019, 2021 go tsena 2022), le tona wa tshireletso setshaba (2019 go tsena 2021).

Dlodo o itsege ka go a ne a eteletse pele lephata la tshireletso setshaba ka nako ya diphuduego tsa 2021 kwa Aforika Borwa, o sale a nna leloko la komiti ya ANC ka 2007. Ka Moranang 2022, o ne a ithola marapo mo pusong go okamela World Bank.

Botshelo jwa a le mmotlana

Dlodlo o tsholetswe kwa ntlong ya ga nkukuagwe kwa Soweto, Gauteng kwa Aforika Borwa, o na le motsalwa le ene a le mongwe. Mmaagwe e ne e le moithuti wa booki, fa raagwe ene a ne a ithutela Bachelor of Science; morago o ne a aloga ka degree ya thuto a nna mogokgo wa sekolo. Fa Dlodlo a sale mmotlana, lolwapa lwa gagwe lo ne lwa fudugela kwa lefatsheng le le mabapi la Swaziland (kwa e leng Eswatini gompieno), e le go tshaba go leka go tila tsamaiso ya puso ya tlhaolele kwa Aforika Borwa le bogolo jang thuto ya batho bantsho. O tsene sekolo se se ikemetseng kwa Swaziland go fitlhelela fa a le lekgarejwana, batsadi ba gagwe ba tlhalana, ene le mmaagwe ba boela Johannesburg. Moragonyana ka 1980, Dlodlo - o ka nako eo a neng a le dingwaga di le lesome le bosupa o ne a tsaya tshwetso ya go tswa mo Aforika borwa gape go nna leloko la Umkhonto we Sizwe (MK), lekgotla le le dirisang dibetsa la African National Congress (ANC) le le neng le le kgatlhanong le puso ya tlhaolele.

O katiseditswe sesole ke MK kwa Angola, morago a katisediwa matlhale a sesole kwa Soviet Union. Tiro ya gagwe le MK e ne e akaretsa go etelela pele lekalana le le neng le itebagantse le go loga maano a go tila dintwa ga sesole sa MK go kgabaganya molelwane wa Swaziland go tsena mo Natal. Ka ngwaga wa 1990, o ne a tlhophiwa moeteledipele wa lekalana la banana la ANC kwa England le Northern Ireland; o ne a le kwa moseja go tsweledisa dithuto tsa gagwe kwa London Institute of Shipping. O ne a aloga ka setlankana sa go okamela dipalamo le go romela dithoto kwa mafatsheng ka 1990, le diploma ya go okamela dikgwebo ka 2017, le di masters tsa tsamaiso ya dikgwebo ka 2020.

Dlodlo o ne a tswelela a le mo botshabing le ANC go fitlhelela ka 1994, fa puso ya tlhaolele e emisiwa semmuso. Fa boa, o ne a ithuta gore monnawe, ka nako ya fa a seo, o ne a bolawa ke makgotla a tshireletso a puso ya tlhaolele, le gore mmaagwe o garotswe pelo ke go tshwarwa le go bogisiwa.

Tiro ya gagwe mo kgwebong

Tiro ya ga Dlodlo ya ntlha morago ga puso ya tlhaolele e ne e le kwa Portnet. Mo ditirong tse di latelang mo mohameng o o ikemetseng, o ne a bereka kwa komponeng e e okametseng melelwane, le ya diporo, ga mmogo le dithomo tsa dikompone tsa melelwane kwa New York le New Jersey le melelwane e e amegang ya Britain. Ka 2014, o ne a re o nnile mookamedi mo dikomponeng di le masome a mararo le borataro mo nako ya gagwe ya pereko - a akaretsa kwa Rosschef Africa, Wired Cloud, le Women in Energy - le ntswa a ne are o ithotse marapo mo bontsing jwa maemo ao fa a tsena mo pusong.

Dlodlo e ne e le mookamedi wa kompone e e neng e bidiwa VIP Consulting Engineers, ka nako e kompone e neng e na le ditumalano le puso kwa Ekurhuleni, Gauteng. Ka kompone e ne ya seka ya diragatsa tumalano ya yone, lekgotla le le tlhokometseng madi a setshaba le ne la tsenya kompone le baokamedi ba yone, ba akaretsa Dlodlo, mo lenaaneng la ba ba kolotang ebile ba ilediwa go dira dikgwebo le puso dingwaga di le tlhano go tswa ka Phukwi 2012 go tsena 2017. Ka nako ya fa kiletso e e simologa ka 2012, Dlodlo o ne a bereka mo pusong a ithotse marapo mo komponeng eo.

Tiro ya gagwe mo pusong

Dlodlo e ne e le mookamedi wa ditirelo tsa ditogamaano kwa Directorate of Special Operations, e e neng e itsege ka leina la Scorpions, e le lekgotla le le faphegileng mo lekalaneng la bookamedi jwa ditsheko, mme a ithola marapo ka 2004. Morago ga go ithola marapo ga gagwe, o ne a tlhotlhomisiwa a bo a atlholelwa melato ya tsietso le bogodu tse di neng di amana le tiro ya gagwe kwa Scorpions ka 2003 le 2004; go ne go bolelwa fa a utsule madi go tswa mo letloleng la sephiri la NPA le gobo a okeditse tuelo ya mosedimosi ka dikete di le masome a mararo. O ne a tshwarwa ka Phalane 2006, mme tsheko ya gagwe e ne ya tshololwa ka Motsheganong 2007; o ne a re o ne a solofetse seo, ka melato ya gagwe e ne e tshegisa.

Dlodlo o ithotse marapo kwa Scorpions ka 2004 go berekela kwa pusong ya kgaolo ya Gauteng, a nna moeteledipele wa lephata la tshireletsego kwa kgaolong.

Botautona jwa ga Zuma (2007 go tsena 2018)

Ka dingwaga tsa 2007 go tsena 2012, e ne e le mokwaledi-mogolo wa lekgotla la mabutswapele a sesole sa MK,a eme nokeng katlego ya letsholo la ga Jacob Zuma la go nna tautona wa ANC kwa bokopanong jwa Polokwane. Kwa bokopanong, jo bo diragetseng ka Morule 2007, Dlodlo o ne a tlhophiwa mo komiting ya ANC. Kanako eo gape, pele ga ditlhopho tsa 2009, tse Zuma a ne a tlhophiwa go nna tautona wa lefatshe, Dlodlo o ne a nna mopalamente wa ANC; ngwaga o o latelang, o ne a thapiwa e le mogakolodi wa palamente wa ga tautona Zuma. Ka Motsheganong 2010, Dlodlo e ne e le mongwe wa maloko a mararo a komiti ya bogakolodi ya ANC a a neng a bona Julius Malema molato wa go tlola dintlha dingwe tsa molaomotheo wa ANC. Ka 2010 gape, mokwalo go tswa kwa go Gayton McKenzie go ya Gold Fields o ne wa supa fa Dlodlo e le mongwe wa barotloetsi mo ofising ya ga Zuma ba ba ntseng nako e telele ba thusa Gold Fields go gwetlha Zuma mabapi le ditumalano tsa meepo; dikinolo dingwe go tswa mo mokwalong di ne tsa gatisiwa ke pampiti ya dikgang ya Mail & Guardian ka 2013.

Ka Ngwanatsele 2010, Zuma o ne a thapa Dlodlo go nna mothusa tona wa ditirelo tsa setshaba le tsamaiso ya tsone, maemo a a nnileng mo go one le morago ga go tlhophiwa gape ga ga Zuma ka 2014, a tswelela mo go one go fitlhelela ka Mopitlo 2017. Mo maemong ao o ne a emetse Aforika Borwa kwa Open Government Partnership, a tswelela a dira jalo go tswa ka 2011 go tsena 2019. Mo tswakanyong ya maphakela a Mopitlo a le masome mararo le motso ngwaga wa 2017, Zuma o ne a thapa Dlodlo mo khuduthamageng ya gagwe ya bobedi, a mo dira tona wa ditlhaeletsanyo; mo tswakanyong e nngwe ka Phalane a le lesome le bosupa ngwaga wa 2017, Dlodlo o ne a diriwa tona wa tsa magae, maemo a a nnileng mo go one mo setlheng sotlhe sa ga Zuma a le mo pusong. Ka nako ya puso ya ga Zuma, Dlodlo o tlhophilwe gabedi mo komiting ya ANC - ka 2012 le ka 2017 - o ne a le modulasetilo wa komiti-potlana ya yone ya molao le puso ka 2015 go tsena 2017.

Ka nako eo, o ne a amega mo mathateng a le mabedi a e seng a a kalo. Pele ka 2015, fa a le mothusa tona, Dlodlo o ne a ya boikhutsong bo go ngangilweng ka bone kwa hoteleng ya Oberoi kwa Dubai; morago go ne ga diragala, mo dipegong tsa metswedi ya dikgang tse di neng di remeletse mo go tse di tlhagileng tsa Gupta, gore loeto lo ne lo rulagantswe ke Sahara Computers, kompone ya lolwapa loora Gupta, ebile lo thusiwa ka madi ke Fana Hlongwane. Mosupi Vytjie Mentor, o ne a akanyetsa mo mokwalong wa mo maranyaneng a Facebook, gore Dlodlo o amogetse loeto lwa mahala go ya Paris. Morago ga dipego tse, ka 2017, Dlodlo o ne a dumalana gore o molato go bo a sa bua gore loeto lwa Dubai e ne e le mpho. Pele ya ngongora ya mopalamente wa kganetso Phumzile van Damme, komiti ya palamente e ne ya lemoga fa Dlodlo a tlodile molao wa palamente ebile a tshwanetse go kgalemelwa. Labobedi, gape ka 2017, Democratic Alliance, phathi e tona ya kganetso, e ne ya kgala Dlodlo go bo a dirisitse sedikadike sa madi a setshaba go reka dikoloi ta matona tse pedi, tsotlhe e le tsa modiro wa Audi.

Botautona jwa ga Ramaphosa (2018 go tsena 2022)

Fa Zuma a ithola marapo ka Tlhakole 2018, Dlodlo o ne a thapiwa e le tona wa ditirelo tsa sethsaba le tsamaiso ya tsone mo khuduthamageng ya ntlha ya motlhatlhamiwa gagwe, Cyril Ramaphosa, kwa a neng a filwe maikarabelo go aga sesha ditirelo tsa setshaba. Le fa go ntse jalo, morago ga go tlhomamisiwa semmuso ga ga Ramaphosa mo setlheng sa gagwe sa ntlha sa botautona ka Motsheganong 2019, o ne a nna tona wa tshiereletso setshaba mo khuduthamageng ya gagwe ya bobedi. O nnile mo maemong a ka nako ya diphuduego tsa 2021 kwa Aforika Borwa, mo go neng ga baka manganga a a tseneletseng a sepolotiki le setshaba ka go retelelwa ga makgotla a tshireletso. Dlodlo morago o ne a re go tshabetswe mo go ene. Dibeke morago ga diphuduego, ka Phatwe a le malatsi a matlhano ngwaga wa 2021, Ramaphosa o ne a phatlalatsa lephata la tsiereletso ya setshaba, a mmusetsa kwa lephateng la ditirelo tsa setshaba le tsamaiso. Le fa go ntse jalo, ka Moranang a simologa ngwaga wa 2022, Dlodlo o ne a ithola marapo mo khuduthamageng le palamente go nnamookamedi wa lekgotla la World Bank, ka maikarabelo a a faphegileng kwa Angola, Nigeria le Aforika Borwa. O ne a re o ithotse marapo ka Phalane 2021, le ntswa Ramaphosa a itsisitse ka gone dikgwedi morago.

Botshelo jwa gagwe

Dlodlo o nyetswe, o na le ngwana wa mosimane a le nosi, Thabang Mnisi.