Greater Mapungubwe Transfrontier Conservation Area

Go kopana ga dinoka tsa Shashe le Limpopo

Greater Mapungubwe Transfrontier Conservation Area (GMTFCA) ke lefelola ngwao la Transfrontier Conservation Area (TFCA), eo pele e neng e tsejwa e le Limpopo -Shashe Transfrontier Conservation Area.

Ditso

Go tlhomiwa

Ka thuso ya Peace Parks Foundation, De Beers, National Parks Trust le WWF-SA, SANParks e kopantse karolo e e botlhokwa ya seabe sa Aforika Borwa mo TFCA e e tshisintsweng. Ka kgwedi ya Phukwi ngwaga wa dikete tse pedi le boraro lefelo la setso la Mapungubwe le ne la begwa fa ele Lefelo la Ngwao-Boswa jwa Lefatshe la UNESCO. Mapungubwe National Park e ne ya bulwa semmuso ka kgwedi ya Lwetse e le masome a mabedi le bone ,ngwaga wa dikete tse pedi le bone. Ditumelano tsa go tlhaloganya ka ga go tlhomiwa ga TFCA o di ne tsa bewa menawna ka kgwedi ya Seetebosigo e le masome a mabedi le bobedi ngwaga wa dikete tse pedi le borataro mme go ne ga tlhomiwa mogokaganyi wa boditšhabatšhaba. Ka kgwedi ya Seetebosigo ele lesome le borobabongwe ngwaga wa dikete tse pedi le borobabongwe, Limpopo/Shashe TFCA e ne ya fetolwa leina go nna Greater Mapungubwe Transfrontier Conservation Area.

Ka ngwaga wa dikete tse pedi le lesome le bobedi go ne ga bonwa dilo tsa bogologolo mo polaseng ya Klein Bolayi, kwa botlhaba jwa Mapungubwe National Park, go netefatsa gore Mapungubwe Cultural Landscape e atologa go ya kwa botlhaba kgotsa kwa tlase ga noka go bapa le Limpopo Valley, le go netefatsa bonno jwa batho mo kgaolong eo dingwaga tse di fetang sekete le makgolo a matlhano

Lefelo le Legolo la Tshomarelo la Mapungubwe le le kgabaganyang melelwane, le gone jaanong le ntseng le tlhabololwa, le tla akaretsa kgaolo ya 4 872 km2 mme 28% (1 350 km2) ya lone e tla nna kwa Botswana mme 53% e nngwe (2 561 km2) e tla nna kwa Afrika Borwa mme 19% e e setseng (960 km2) e tla nna kwa Zimbabwe. Lefelo leno le botlhokwa thata ka ntlha ya mabaka a go le sireletsa. Go na le mefuta ya ditshedi jaaka tlou, tau, nkwe, cheetah, ntša e e tlhaga; mmogo le diamudi di le lesome le borobabongwe, mefuta ya dimela e le masome a mabedi le borataro le palo e e lekaneng ya mefuta ya dinonyane e e kwadisitsweng mo bukeng e khibidu ya tshedimosetso. Go okediwa ga lefelo, tshireletso le maiteko a a kopaneng a a tlametsweng ka go tlhomiwa ga GMTFCA go thusa thata mo tshireletsong ya mefuta e e fitlhelwang mo lefelong leno. Dipopego tsa naga tse di kgatlhisang le dipharologano mo teng ga GMTFCA di dira gore e nne lefelo le lentle thata la tlholego la Borwa jwa Aforika, mme se se oketsang seno ke mafelo a ngwao-boswa, a a oketsang bokgoni jwa GMTFCA jwa go ngoka palo e kgolo ya bajanala ba selegae le ba boditšhabatšhaba.

Aforika Borwa

Lefelo le le tletseng makhubu la Mapungubwe National Park

Seabe sa Aforika Borwa mo kgaolong ya tshomarelo ya molelwane se akaretsa kgaolo ya konokono ya Mapungubwe National Park mmogo le Venetia Limpopo Nature Reserve. Kgato ya bobedi ya porojeke e ikaelela go akaretsa palo e e okeditsweng ya ditsha go akaretsa Limpopo Valley Conservancy e e tshisintsweng, Mapesu Private Game Reserve, Mogalakwena Game Reserve e e tshisintsweng, Vhembe Game Reserve gammogo le dipolase tse di potlana tsa poraefete. Sebaka se se atlanegisitsweng ke diheketara di le 256,100 kgotsa 53% ya kgaolo yotlhe ya Greater Mapungubwe Transfrontier Conservation Area.

Botswana

Seabe sa Botswana mo Greater Mapungubwe Transfrontier Conservation Area se akaretsa Northern Tuli Game Reserve, e e nang le ditsha di le masome a mararo le boratarotse di nang le beng ba tsone tse di akaretsang kgaolo ya diheketara di le 71,173. Mo kgatong ya bobedi, go solofetswe gore kgaolo eno e oketsege ka bogolo ka go akaretsa Central Tuli Farms le Shashe CCA e e solofetsweng. Mo godimo ga moo, kgaolo e e simololang kwa toropong ya Mathathane North go ya kwa Kobojango le go ya kwa Nokeng ya Shashe le yone e tla nna karolo ya GMTFCA. Ka kakaretso go solofetswe gore seabe sa Botswana mo TFCA e tla nna 135,000 ha, e e ka nnang 28% ya kgaolo yotlhe ya Greater Mapungubwe Transfrontier Conservation Area.

Zimbabwe

Sentinel Ranch, Nottingham Estate le Tuli Circle Safari Area di dira seabe sa Zimbabwe mo GMTFCA. Mo kgatong ya bobedi, Maramani, Machuchuta mmogo le Hwali Wildlife Management Areas le tsona di ka akarediwa, go atolosa bogolo jwa seabe sa Zimbabwe mo Greater Mapungubwe Transfrontier Conservation Area go fitlha go diheketara di le dikete tse masome a robabongwe le borataro kgotsa bokana ka 19% ya kgaolo yotlhe ya phaka.