Meredith Grey

Meredith Grey o o ithutetseng bongaka ebile e le leloko la lekgotla la dingaka tsa loaro kwa America (o o tshotsweng ka ngwaga wa 1978) ke moanelwa o o itlhametsweng go tswa mo motseletseleng wa motshameko wa Grey's Anatomy, o o supiwang kwa United States mo komponeng ya American Broadcasting Company (ABC). Moanelwa o o tlhamilwe ke motlhami Shonda Rhimes, o tshamekiwa ke modiragatsi Ellen Pompeo. Meredith o tlhageletse e le lantlha mo legatong la ntlha la "A Hard Day's Night", le le gasitsweng ka Mopitlo a le masome mabedi le bosupa ngwaga wa 2005. O tlhagelela gape mo setshwantshong sa motseletsele se se tswang mo motshamekong o o sa Station 19, e le moanelwa o o tlhagelelang gangwe le gape.

Meredith ke moanelwamogolo wa motshameko o, a itsisitswe e le moithuti wa loaro kwa sepateleng se se itlhametsweng sa Seattle Grace (se morago se fetogileng go nna Seattle Grace-Mercy West, le Grey Sloan Memorial morago). O felela a nna mo maemong a bongaka jwa loaro, morago a nna ngaka e e eteletseng pele ba bangwe. Ka ngwaga wa 2016, o ne a nna mo maemong a moeteledipele wa dingaka tse di arang dikarolo tse difarologaneng tsa mmele. E le morwadie ngaka ya loaro e e tumileng ebong Ellis Grey (Kate Burton), Meredith o gotlhagotlhana le go lekalekanya dikgwetlho tsa go nna ngaka, go nna le botsalano le monna wa gagwe, Derek Shepherd (Patrick Dempsey), seabe sa gagwe e le motsadi, le botsalano le babereki ka ene. Botsalano jwa gagwe le babereki ka ene Cristina Yang (Sandra Oh), Izzie Stevens (Katherine Heigl), Alex Karev (Justin Chambers) le George O'Malley (T.R Knight) ke boremelelo jwa diphetogo tsa motshameko kwa tshimologong.

Meredith ke moanedi wa motshameko ebile e le boremelelo jwa bontsi jwa magato a motshameko, le ntswa dikakanyo tsa baanelwa ba bangwe le tsone di lebelelwa. Kutlwano ya ga Pompeo le Dempsey e ipeletswe e le setlhoa sa motshameko. Rhimes o tlhalositse Meredith e le motho o o sa dumeleng mo bomolemong kgotsa bosula, mme a dira se a dumelang se siame. Meredith Grey o amogetswe sentle ke ba ba kgalang, Alessandra Stanley wa New York Times a mmitsa mogaka wa Grey's Anatomy.

Go tshameka Meredith ga ga Pompeo go amogetswe sentle mo motseletseleng o o otlhe, se se baka go itsege thata ga moanelwa oo. Pompeo o tlhophetswe dietsele di le dintsi, di akaretsa seetsele sa Golden Globe go nna modiragatsi o o gaisang le sa Satellite tsotlhe e le tsa 2007. O amogetse ditlhopho di le dintsi tsa dietsele tsa people's Choice tsa modiragatsi o o gaisitseng, a fenya ka 2013 le 2015.

Botshelo jwa moanelwa

Tse di diragetseng pele

Meredith Grey ke morwadie ngaka ya loaro e e tumileng le fatshe ka bophara, Ellis Grey (Kate Burton), o godile a tshwantshanngwa le ene. Ellis e ne e le motsadi o o nang le diphoso ebile a itlhokomolosa tiro ya botsadi. O ne a fudusa Meredith go tswa Seattle go ya Boston kwa a neng a seka a tlhola a buisana le rraagwe.

Meredith o alogile kwa Dartmouth College. Fa a santse a le kwa sekolong seo, o ne a tshela botshelo jwa go e itumedisa. Go gotlhagotlhana le mmaagwe le go tlhoka kemo nokeng go bakile gore Mredith a ipotsolose ka tshwetso ya gagwe ya go tsena sekolo sa bongaka. Go tlhoka go itshetlela mo tshwetsong ya gagwe go e ga baka gore a tswe kwa Europe fa a sena go aloga. Le fa go ntse jalo, morago ga go nna kwa moseja sebaka sa kgwedi, Meredith o ne a boela go tlhokomela mmaagwe, o a neng a lwala bolwetsi jwa go lebala jo bo simolotseng a sale mmotlana. Dikgang tse di ne di eteletse pele tshwetso ya ga Meredith go aloga ka M.D.

Tsamaiso ya polelo ya motshameko

Bosigo pele ga Meredith a simolola go ithutela tiro, o tlhakanela dikobo le Derek Shepherd (Patrick Dempsey). O itemogela letsatsi le le latelang gore ke mookamedi wa lekalana la loaro lwa boboko kwa tirong ya gagwe e ntsha, kwa sepateleng sa Seattle Grace.

Meredith o bereka ka fa tlase ga bookamedi jwa ga Miranda Bailey (Chandra Wilson), a bo a tsalana le babereki ka ene Cristina Yang (Sandra Oh), Izzie Stevens (Katherine Heigl), Alex Karev (Justin Chambers) le George O'Malley (T.R Knight). O gaufi thata le Cristina, o a nnang tsala ya gagwe le "motho wa gagwe". Pele o ne a sa rate Alex, mme le ene o felela a nna "motho wa" ga Meredith, bobedi boo bo nna le botsalano jo bo tshwanang le jwa batsalwa mmogo.

Meredith ga a utlwane thata le Richard Webber (James Pickens Jr.), mookamedi wa lephata la loaro kwa Seattle Grace. Richard o ne a kile a ratana le Ellis fa Meredith e santse e le ngwana. Gantsi o tshameka seabe sa ga raagwe, selo se a neng a sa se batle pele.