Moepo wa diteemane wa Karowe

Moepo wa diteemane wa Karowe

Lefelo la moepo wa teemane wa Karowe
Location
Production
Products	Diteemane

Moepo wa diteemane wa Karowe ke moepo o o kwa Botswana. Ke moepo wa lehuti le le bulegileng. Ka ngwaga wa dikete pedi masome a mabedi le motso, kompone ya Lucara ya diteemane e ne ya ntsha madi a didikadike di le makgolo a mabedi le masome a mabedi a di dolara go isa moepo kwa tlase ga lefatshe.

Ditso

Moepo wa Karowe (Karowe ke lefoko la mo gae la Sesarwa le le rayang lejwana), o kwa bokone jwa Botswana, o upolotswe ka ngwaga wa sekete makgolo a robabongwe le masome a supa ke kompone ya De Beers, e e leng yone gape e e upolotseng moepo wa Orapa, o e leng one wa ntlha wa diteemane mo lefatsheng le, le meepo e mengwe e le meraro ka dingwaga tsa sekete makgolo a robabongwe le masome a supa di le fa gare.

De Beers e ne ya upolola kimberlite A/K6 mme tshekatsheko ya bone ya pele e ne ya supa botlhokwa jo bo kwa tlase mo itsholelong, moepo o le bophara jwa diheketara di le tharo fa godimo. Beng ba moepo ba fetogile makgetho a le mararo. Ka ngwaga wa dikete pedi le borobabongwe, De Beers e ne ya rekisa masome a supa mo lekgolong a bontlha jwa moepo ba rekisetsa kompone ya kwa Canada ya Lucara ka didikadike di le masome a mane le borobabongwe. Morago, Lucara e ne ya nna bone fela beng ba moepo otlhe.

Moepo o butswe ka ngwaga wa dikete pedi lesome le bobedi. Ka Seetebosigo, thekiso ya ntlha ya diteemane tse di sa rethefadiwang go tswa mo moepong e ne ya tshwarwa. Ka kakaretso dingwaga tsa one tsa ntlha di tsamaile botoka thata.

Kompone e dirisa didirisiwa tsa sesha, tse di ba fang bokgoni jwa go epa diteemane tse ditona tse moepo o itsegeng ka tsone. Sedirisiwa se sengwe ke sa X-Ray Transmission (XRT), se se simotseng go dirisiwa ka ngwaga wa dikete pedi lesome le botlhano, se morago se neng sa dira gore go epiwe diteemane di le mmalwa tsa dikharete di feta makgolo a mararo kgotsa digereme di le masome a marataro nngwe le nngwe ya tsone.

Ka ngwaga wa dikete pedi lesome le borobabobedi o le fa gare, moepo o ne o thapa batho ba feta makgolo a robabobedi, masome a robabongwe le borobabobedi mo lekgolong la bone e le baagedi ba mo gae.

Diteemane tse di bongweng tsa tlhwatlhwa

Ka ngwaga wa dikete pedi lesome le botlhano, diteemane di supa di epilwe mo moepong o. Nngwe le nngwe ya tsone e feta dikereme di le masome a marataro (dikharete di le makgolo a mararo); tse tharo di epilwe mo sebakeng sa beke ka Ngwanatsele: "Lesedi la Rona" (e pele e neng e le dikereme di le makgolo a mabedi, masome a mabedi le bobedi (dikharete di le sekete, lekgolo lesome le motso); morago ga go tlhatswiwa, e le dikereme di le makgolo a mabedi masome a mabedi le motso (dikharete di le sekete, lekgolo le borobabongwe)) "The Constellation" (dikereme di le lekgolo masome a marataro (dikharete di le makgolo a robabobedi le boraro)) le lejwana le le sa fiwang leina la dikharete di le makgolo a mararo masome a supa le bone. Ga mmogo le ya "Queen of the Kalahari" e e bongweng pele ya dikereme di le masome a marataro le borobabobedi (dikharete di le makgolo a mararo masome a mane le bobedi), tsotlhe, di le bokete jo bo tlhakantsweng jwa dikereme do le makgolo a matlhano masome a mabedi le bosupa (dikharete di le dikete pedi, makgolo a marataro masome a mararo le borobabobedi) di rekisitswe ka didikadike di le lekgolo masome a matlhano le bone.

"Lesedi la Rona" e ne e le lejwana la boleng jwa bobedi ka bogolo mo lefatsheng ka bophara ka nako eo, e sala morago teemane ya Cullinan e e upolotsweng ka ngwaga wa sekete makgolo a robabongwe le botlhani mo Aforika Borwa wa gompieno. Ka nako eo gape e ne e le yone e tona mo Botswana, e feta e e bongweng kwa moepong wa Jwaneng ka ngwaga wa sekete, makgolo a robabongwe masome a robabongwe le boraro ka ngwaga wa dikete pedi lesome le bosupa, e ne ya rekisediwa moitsenape wa mekgabisa wa kwa Lontone Graff didikadike di le makgolo a matlhano le boraro.

Morago Lucara e ne ya feta seelo sa yone gabedi. Ka ngwaga wa dikete pedi lesome le borobabongwe, teemane ya Sewelo ya dikereme di le makgolo a mararo masome a matlhano le motso (dikharete di le sekete, makgolo a supa masome a matlhano le borobabobedi) e ne ya upololwa kwa moepong o o. Morago e ne ya rekiwa ke kompone ya Louis Vuitton ya kwa France ka madi a a sa buiwang.

Ka Phatwe a le masome mabedi le bobedi ngwaga wa dikete pedi masome a mabedi le bobedi, Lucara e ne ya itsise fa e upolotse teemane e e sa rethefadiwang ya dikereme di le makgolo a mane masome a robabongwe masome a robabobedi (dikharete di le dikete pedi, makgolo a mane, masome a robabongwe le bobedi) koo. Gompieno, ke yone teemane ya bobedi e tona ya boleng joo go bonwa, go ya ka puso ya Botswana, ke yone e tona thata go bonwa mo lefatsheng le.