Moud Goba

Moud Goba
Tsalo	Harare Zimbabwe
Lephata	Micro Rainbow International Gay Afrika UK Black Pride
O fetheletse	Seetsele sa Attitude ka 2017 Bomme ba ba lekgolo ba BBC ka 2022 Seetsele sa mafatshefatshe sa BET International ka 2023

Moud Goba ke molwela ditshwanelo tsa batho ba ba ratanang ka bong bo bo tshwanang wa kwa Zimbabwe. Ke motshabi kwa United Kingdom kwa a gorogileng teng a santse a le mmotlana e le mokopi wa botshabelo a tshaba kwa Zimbabwe morago ga dingwaga tsa pogiso go bo a ratana le basadi jaaka ene.

Botshelo jwa a le mmotlana

Goba o goletse kwa Harare, Zimbabwe. O tshabile kwa lefatsheng leo ka nako ya puso ya ga Robert Mugabe, e go neng go bogisiwa ebile go tshwenngwa batho ba ba ratanang ka bong bo bo tshwanang. Morago ga go kopa botshabelo kwa UK, o ne a leta dingwaga di le pedi gore kopo ya gagwe e atlege. Goba o ne a re nako eo ya go leta ke nako ya go ithaopa mo makgotleng a a farologaneng le go tlhama la gagwe - Gay Afrika - go nthusa go batla ba bangwe ba ba tshwanang le nna ba ba nnang kwa UK.

Go lwela ditshwanelo

Goba ke mongwe wa batlhami ba UK Black pride, moletlo wa baratani ba bong bo bo tshwanang ba bantsho kwa Lontone o o diragetseng fa e sale ka 2005. Ke modulasetilo wa baeteledipele ba one.

Goba o bereka e le moookamedi mananeo kwa Micro Rainbow International, lekgotla la bopelotlhomogi le le emeng nokeng batho ba ba senang magae ba ba ratanang ka bong bo bo tshwanang mme ba batla botshabelo. Goba o bereka go thusa batshabi go batla ditiro gape o eteletse pele lenaneo la go batla magae a a babalesegileng le le thusang batho ba ka nna dikete di le masome a mabedi le botlhano ngwaga le ngwaga ba ba ratang ka bong. Goba o itebagantse le batshabi ba ba gorogelang kwa UK go tswa Afghanistan.

Ka ngwaga wa 2022, Goba e ne e le bontlha jwa mogwanto wa ditshwanelo tsa baratani ba bong bo bo tshwanang kwa pulong ya metshameko ya mafatshe a selekane kwa lobaleng lwa Alexander kwa Birmingham, England, a na le balwela ditshwanelo ba bangwe ba le batlhano le Tom Daley.

Go bereka ga gagwe le makgotla a a santseng a simolola mo go thuseng batshabi ba ba ratanang ka bong bo bo tshwanang, Goba o ne a akareditswe mo lenaaneng la baagi ba mafatshefatshe ka 2023 ba ba lwelang ditshwanelo, go supiwa fa e le mongwe o o tlaa beiwang leitlho ka 2023.

Dietsele le ditlotla

Ka ngwaga wa 2015, pampiri ya The Independent e ne ya supa Goba fa e le mongwe wa batho ba ba ratanang ka bong bo bo tshwanang ba ba nang le thotloetso kwa UK, ka maitemogelo a gagwe a go bereka le batshabi.

Ka ngwaga wa 2017, pampiri ya dikgang ya Attitude e ne ya lemoga thuso ya ga Goba ya go thusa bathsbai ba bangwe ka go mo fa tlotla ya seetsele sa Attitude Pride.

Ka 2022, Goba o ne a le mo lenaaneng la bomme ba le lekgolo ba BBC. a lemogiwa ka seabe sa gagwe mo batshabing ba ba ratanang ka bong bo bo tshwanang.

Ka ngwaga wa 2023, Goba o ne a amogela seetsele sa BET International go bo a batlela batshabi ba ba ratanang ka bong bo bo tshwanang mafelo a botshabelo le go ba amanya le setshaba.