Steve Biko

Setshwantsho sa ga Steve Biko

Stephen (Steve) Bantu Biko e ne e le lentswe le le itsegeng la kgololo ya Bantsho mo Aforika Borwa magareng ga bogare jwa dingwaga tsa bo-1960 le loso lwa gagwe mo diatleng tsa mapodisi ka 1977. Eno e ne e le nako e mo go yone mekgatlho ya ANC le PAC e neng e thibetswe semmuso, motlhang batho ba Bantsho ba ba neng ba tingwa ditshwanelo (segolo bogolo basha) ba neng ba amogela ka diatla tsoopedi ntlha ya mokgatlho moswa o o neng o ka lwantshana le ditshiamololo tsa puso ya tlhaolele.

Ke ka moo mokgatlho wa ga Biko wa Black Consciousness Movement (BCM) o neng wa tlhagelela mme le fa Biko e ne e se ene fela moeteledipele wa one, e ne e le ene yo o itsegeng go feta botlhe. E ne e le Biko, mmogo le ba bangwe, ba ba neng ba kaela ntlha ya go se itumele ga baithuti go nna maatla a sepolotiki a a neng a ise a ke a bonwe mo hisitoring ya Aforika Borwa. Biko le balekane ba gagwe ba ne ba tsibogela ditiragalo e di neng di tlhaga mo motlheng o o kwa godimo wa tlhaolele, fa phathi ya Nationalist Party (NP), e e neng e busitse dingwaga di masome a mabedi, e ne e rulaganya naga sesha go tsamaelana le melao ya yone ya tlhaolele(separate development). NP e ne e kgaoganya batho ba Basweu, Bantsho, Bammala le Baindia ka go tlhama mafelo a maswa a bonno, ditheo tse di sa kopaneng jaaka dikolo, diyunibesithi le makgotla a tsamaiso, mme e bile, le go tlhama 'dinaga' tse diswa, e leng magae a semorafe (homelands).