Theophilus Hamutumbangela

Moruti Theophilus Hamutumbangela( o o tshotsweng ka Tlhakole a le malatsi a marataro ngwaga wa 1917 a tlhokafala ka Ngwanatsele a le masome mabedi le borobabobedi ngwaga wa 1990) e ne e le molweladitshwanelo o o kgatlhanong le tlhaolele, moruti le motlotlomadi wa mafatshefatshe wa boipuso jwa Namibia, a bereka le molweladitshwanelo o mongwe o e leng moruti le ene Michael Scott.

Botshelo le pereko

Hamutumbangela e ne e le setlogolo sa ga Mandume Ya Ndemufayo, kgosi ya morafe wa Ovambo. O tshotswe ka letsatsi le malomaagwe a tlhokafetseng ka lone. Hamutumbangela e ne e le monna o moleele a nonofile.

Fa a le dingwaga di le lesome le bosupa, Hamutumbangela o ne a tsena sekolo kwa St. Mary's kwa Odibo: e le moithuti, le e le morutabana. O ne a ya go ithutela boruti kwa St. Bedes, Umtata, a bewa motiakone ka ngwaga wa 1946, le boruti ka 1947. O berekela mo dikerekeng kwa Etale, Windhoek le Omboloka.

Hamutumbangela o ne a bua kgatlhanong le tlhaolele ya lotso le mmala le go tlhoka tshiamo ga ditsamaiso tsa puso ya tlhaolele, o ne a dira kopo kwa lekgotleng la United Nations makgetho a le mantsi ka boipuso jwa Namibia. Ke mongwe wa basimolodi ba Ovamboland People's Organization gape ke ramaemo mo tsuologong ya Old Location.

Hamutumbangela o ne a isiwa kgolegelong ka ngwaga wa 1966, go belaelwa fa a ne a jisiwa botlhole ke babusi ba Aforika Borwa. Botlhole jo bo ne jwa mo koafatsa, a nna segole mo mmeleng le mo tlhaloganyong go fitlhelela a tlhokafala ka 1990.

Go lemogiwa

Ka ngwaga wa 2012, go ne ga bulwa diofisi kwa Oshikango tse di neng tsa fiwa leina la ga moruti Theofilus Hamutumbangela.

Go na le sefikantswe sa gagwe, le sa ga Hosea Kutako le Hendrik Samuel Witbooi kwa lefelong le eleng tshimo ya palamente kwa Windhoek.