Vusimuzi Matlala

Vusimuzi “Cat” Matlala ke sekebekwa sa Aforika Borwa se se itsegeng ka go nna le seabe mo dikonterakeng tse dikgolo tsa puso le dikganetsano tse di amanang le tsone. O nna kwa Pretoria. O tlhalositswe mo bobegadikgannyeng e le “mookamedi wa itshireletso” le “mogwebi mogolo wa dikgwebo.

Matlala o kaela dikompone di le mmalwa mo makaleng a itshireletso le ditirelo tsa kalafi. Sekai, e ne e le mokaedi a le esi wa Medicare 24 kwa kgaolong ya Tshwane, kompone e e tsisang ditirelo tsa taolo ya dikotsi tsa boitekanelo, le mokaedi yo o tlhagafetseng wa Cat VIP Protection Pty Ltd, Falcon Cat Trading and Suppliers, Lux South African Investments Pty, Ltd, Cor Kabeng Trading & Suppliers le Black AK Trading. Ka difeme tse, o ne a atologela mo dikonterakeng tsa go reka dithoto tsa puso le tsa ditirelo tsa boitekanelo.

Tiro

Matlala o ne a aga tiro ya gagwe mo go tsa tshireletso e e ikemetseng le go reka dithoto tsa tlhokomelo ya botsogo. Mo godimo ga Medicare 24, o na le dikompone tse di amanang le itshireletso. O tsamaisitse Black AK Trading le Cor Kabeng Trading (difeme tse dinnye tse di kwadisitsweng ka 2017) tse di neng tsa nna le seabe mo dikonterakeng tsa tlamelo ya dikokelo. Babatlisisi ba ne ba lemoga gore Black AK le Cor Kabeng di ne tsa tlhamiwa pelenyana fela ga ba fenya dikopo, mme Matlala o ne a nna a kwadilwe jaaka mokaedi wa bobedi jono.

Mo lephateng la itshireletso, Matlala o itsege ka go okamela tshireletso ya Cat Protection le ya Cat VIP Holdings. Difeme tseno di tlametse ka ditirelo tsa tshireletso le tse di amanang le tsone. Ditirisano tsa gagwe tsa kgwebo di ne tsa nna le maemo a a kwa godimo mo setšhabeng morago ga motseletsele wa dikonteraka tsa puso mo bogareng jwa dingwaga tsa bo 2020. Dipatlisiso tsa bobegakgang di tlhagisa gore o ne a “tlhagelela thata ka motseletsele wa dikonteraka tse di nang le poelo le puso ya Aforikaborwa ”. Dikompone tsa gagwe di ne tsa fenya ditiro di le mmalwa, mme gape tsa ngoka go sekasekwa ke baruni le babatlisisi.

Matlotlo a ga Matlala a lekanyediwa magareng ga didikadike di le lekgolo le le lekgolo le matlhano a diranta.

Go nna le seabe mo dithendarang

Leina la ga Matlala le golaganngwa le dikonteraka di le mmalwa tse dikgolo tsa dithendara tsa puso. Ka 2021, motlhodi wa dikgang Babita Deokaran, tlhogo ya setlhopha sa lephata la botsogo la Gauteng se se kgatlhanong le tshenyetso setshaba, o ne a supa go sa dire dilo ka tshwanelo mo dikonterakeng kwa Kokelong ya Tembisa tse di neng tsa abelwa dikompone tse a neng a di laola. Setlhopha sa ga Deokaran se supile didikadike tsa diranta tse di dirisitsweng mo dithotong le ditirelong go tswa go Black AK Trading & Suppliers le Cor Kabeng Trading & Suppliers, mme sa akanyetsa ditatofatso tsa tsietso kgatlhanong le difeme tseno. Deokaran o bolailwe ka Phatwe 2021 pele ga dipatlisiso di ka konelwa. setlhopha se se Kgethegileng sa Dipatlisiso le Hawks moragonyana di ne tsa dira dipatlisiso tse di tshwanang mo dikonterakeng tseno tsa bookelo, mme Matlala o ne a bidiwa mokaedi wa difeme tse di neng di amega. Ka Lwetse SIU e ne ya golola dipegelo tsa yone tsa nakwana mme e latedisitse batsisi ba ditirelo kgotsa batlamedi ba ditirelo ba le masome mane le motso ba ba golaganeng le kokelo ya Tembisa mme dikompone di le tharo tse di neng di abetswe dikonteraka tsa boleng jwa R13 538 292 mo setlhopheng seno di golagane le Vusimuzi Matlala.

Ka ngwaga wa 2024, kompone ya ga Matlala ya Medicare 24 Tshwane District e ne ya abelwa konteraka ya ditirelo tsa boitekanelo ya dingwaga di le tharo le Tirelo ya Sepodisi sa Aforika Borwa (SAPS) ya boleng jwa R360 milione. Ka fa tlase ga konteraka eno, Medicare 24 e ne e tshwanetse go tlamela ka ditshekatsheko tsa kalafi le ditirelo tsa boitekanelo go maloko a mapodise a ka nna 180 000. Ditokomane tsa kabo ya dikopo tse di phatlaladitsweng ke mapodisi, ka seetebosigo 2024, di netefatsa gore kompone ya ga Matlala e ne e le yone fela e atlegileng go bona konteraka ya R360m. Kabo eno e ne ya ngoka go tsenngwa leitlho ka bonako: moragonyana babatlisisi ba ne ba ribolola bosupi jwa go tsietsa le go dirisana mmogo, mme badiredibagolo ba mapodise ba ne ba dumela gore thendara e ne e “tshwailwe ka ntlha ya tsietso le ditlolomolao tse dingwe”. Mo bogareng jwa 2025 konteraka e ne ya phimolwa ka tshoganyetso ke molaodi wa bosetšhaba wa sepodisi Fannie Masemola, a umaka go sa dira dilo ka tshwanelo.

Dikganetsano

Ka ngwaga wa 2024, Matlala o ne a tshwarwa mme a latofadiwa ka ditlolomolao tse dintsi. Go ya ka ditokomane tsa kgotlatshekelo, o lebanwe le ditatofatso tsa go leka go bolaya, go loga leano la go bolaya le go dirisa madi ka tsela e e sa siamang. Ditatofatso tseno di amana le tiragalo tsa 2023 e mo go yone koloi e e neng e tshotse kgarebe ya gagwe ya pele, e le modiragatsi wa Aforika Borwa e bong Tebogo Thobejane, e neng ya thuntshiwa gaufi le Sandton . Matlala o latofadiwa ka go rulaganya thuntsho e, mme o ganne gore o na le seabe kgotsa maitlhomo ape. Thobejane o ne a gobala mo leotong mme morago a tshaba mo lefatsheng, a re o tshogela botshelo jwa gagwe. O ipoletse gore ga a molato mo ditatofatsong tsotlhe mme o sa ntse a le mo kgolegelong morago ga go ganelwa ka go letlela tsheko kwa ntle ga kgolegelo, ka Lwetse a le lesome le bosupa 2025, ka mabaka a gore ke ka tloga a thoba le gore o kotsi mo setšhabeng.

Mo ditheetsong tsa ikopelo ya go letlela tsheko kwantle ga kgolegelo, balaodi ba ne ba lemoga dintlha di le mmalwa tse di akantshang gore Matlala a ka tila go sekisiwa: ba ne ba latofatsa gore o na le lekwalo laitshupo la tsietso la Eswatini le dithoto tsa kwa ntle ga lefatshe (jaaka sefofane se se ikemetseng le diakhaonto tsa banka tsa kwa ntle) tse di ka thusang go fofa. Matlala o ganne dipolelo tse, a ganetsa gore dithoto tseo ke tsa gagwe le go pega babatlisisi molato wa go jala bosupi.

Mo godimo ga ditatofatso tsa bokebekwa, Matlala o ile a amega mo ditatofatsong tse di anameng tsa “go tshwara mapodise,” dipolelo tsa gore badiredibagolo ba sepodise ba ne ba tlhotlhelediwa ka tsela e e sa siamang ke batho ba kgwebo. Go begwa fa babatlisisi ba mo tsaya e le motho yo o botlhokwa mo ditatofatsong tse di ntseng jalo, tse di nnileng le seabe mo go simololweng ga Khomišene ya Dipatlisiso ya Madlanga ka ga tshenyetso setshaba ya SAPS. Tona ya pele ya sepodisi Bheki Cele o dumetse gore o kopane le Matlala dibeke pele ga thendara ya R360m e phimolwa. Ka ntlha ya seo, ditirisano tsa ga Matlala tsa kgwebo le dikgolagano tsa sepolotiki di gogile tebelelo e e tseneletseng ya setšhaba le ya semmuso kwa Aforika Borwa. Ka Lwetse a le masome mabedi le boferabongwe 2025, mookamedi wa botlhodi jwa bosenyi Dumisani Khumalo o ne a tlamela ka tshedimosetso e nngwe mo setlhopheng sa bosenyi se se rulagantsweng se se raraaneng, se se bidiwang “Big Five” se Matlala e leng karolo ya sone. O umakile The cartel, e e kwa Gauteng, go bolelwa fa e amega mo makaleng a a farologaneng a bosenyi jo bo rulagantsweng, go akaretsa le go gweba ka diritibatsi, go gapa batho ka dikgoka, tsietso ya dithendara, le dipolao tsa dikonteraka.