Sirikan Charoensiri

Sirikan Charoensiri
Tsalo	1986 Yasothon, Thailand
Letso	Thailand
Thuto	Triam Udom Suksa School Thammasat University
Tiro	lawyer

Sirikan Charoensiri ke mmueledi wa ditshwanelo tsa batho kwa Thailand, tshotswe kwa ngwaga wa 1986, o itsege gape ka leina la June Charoensiri. O bereka le babueledi ba Thai Lawyers for Human Rights (TLHR) mme ebile ke moemedi wa balwela ditshwanelo ba baithuti ba le elesome le bone go tswa kwa New Democray Movement (NDM). O itemogetse tlhorontsho le matshosetsi, ga mmogo le di tshekiso tse di tsamaelanang le tiro ya gagwe ya go lwela ditshwanelo go tswa mo babusing ba kwa Thailand. Ke mmueledi wa ntlha wa mo Thai go ka atlholelwa go batla go thankgola puso, a atlholwa ke ramasole wa koo.

Thuto

Sirikan Charoensiri o tsholetswe kwa Thailand ka ngwaga wa 1986, o godiseditswe kwa Yasothon, kwa kgaolong ya Yasothon. O tsene sekolo kwa Triam Udom Suska High School, a ya go tsena sekolo sa molao sa Thammasat University se a alogileng kwa go sone ka ngwaga wa 2009. Morago ga go fetsa dithuto tsa gagwe tsa degree, Charonsiri o ne a fetsa ithutelo tiro ya kwa International Commission of Jurists, mme a yago bereka le ba Association for the Prevention of Torture le American Bar Association on the prevention of Torture dingwaga di le pedi. Ka ngwaga wa 2013, o ne a ikwadisetsa go dira master of laws kwa University of Essex go ithutela molao wa ditshwanelo tsa batho wa mafatshefatshe.

Tiro

Sirikan Charoensiri wa kwa Thailand a na le Melania Trump kwa dietseleng tsa International Women of Courage Awards ka ngwaga wa 2018

Morago ga go fetsa dithuto tsa gagwe tsa masters in Law, Charonsiri o ne a boela go bereka kwa International Commission of Jurists. Ka nako ya thankgolo ya puso ya ngwaga wa 2014, o ne a bona go tlhokafala gore go simolodisiwe lekalana le le tla berekang le dikgang tsa molao, ka babueledi ba ne ba kganelwa go kopana le batho ba ba ba buelelang, masole a tshwara batho ntle le mekwalo ya taolo, a ba tlhatlhela ba sena melato kwa mafelong a sephiri. Lekgotla la Thai Lawyers for Human Rights, ba le simolotse e le lefelo le le thusang batho ka dikgakololo, mme morago la tloga la atolosiwa go nna setlhopha sa babueledi ba ditshwanelo tsa batho, le tlamelwa ka dithuso tsa ditlhopha tsa babueledi tsa mafatshefatshe go bereka mo dikgannyeng tsa tsuololo ya ditshwanelo tsa batho.

Ka ngwaga wa 2015, Charonsiri o ne a kgona go golola mmegadikgang wa dinepe Anthony Kwan Hok-chun wa Initium Media organization go tswa kwa Hong Kong. Kwan o neng a ile Thailand go bega ka go thuntshiwa ka dibomo kwa Erawan Shrine, o ne a ile ka dilwana tsa tshireletso di akaretsa jekete le helemete, a sa itse gore dilo tseo di laolwa ke molao wa Thai wa dibetsa. O ne a tshwarwa fa a ne a leka go boela kwa Hong Kong mme bukana ya gagwe ya mosepele ya tsewa mo go ene.

Ngwaga yone eo, baithuti ba le lesome le bone ba ba neng ba dirile dipopelelo ba ne ba tshwarwa ka Seetebosigo ngwaga wa 2015, mme ba lebisiwa molato wa go batla go thankgola puso. Charoensiri le babueledi ba bangwe ba ba neng ba emetse baithuti ba, ba ne ba ema kgatlhanong le gore baithuti ba ne ba sekisediwa kwa kgotlatshekelong ya sesole. Dikgwedi tse supa morago ga go tshwarwa ga baithuti, Charoensiri o ne a lebisiwa molato wa go gana go obamela molao le go fitlha bosupi. Molato o o simologile fa a sena go amogela mogala wa lotheka mo mongweng o a neng a mo emetse, mme a o baya mo koloing ya gagwe. Letsatsi le le latelang, o ne a kwalela kgotlatshekelo lokwalo lwa ngongora kgatlhanong le mapodisi ka ba ne ba tsaya koloi ya gagwe gore ba batlisise mme e se ka fa molaong. Kgang e e ne ya baka gore a okelediwe melato ya go tlhoka go bua boammaruri ka mapodisi.

Morago ga go tsenela phuthego ya masome a mararo le boraro ya United Nations Human Rights Council kwa Geneva, Charoensiri o ne a tshwarelwa melato e mengwe ya go nna kgatlhanong le puso le go batla go thankgola puso. E ne e le lantlha mmueledi a lebisiwa molato wa go thankgola puso ke ramasole, selo se se neng sa baka kgaruru mo makgotleng a mafatshefatshe a ditshwanelo tsa batho.

Ka kgwedi ya Motsheganong e le malatsi a le lesome le boferabongwe ngwaga wa 2017, Sirikan Charoensiri o ne a neelwa seetsele sa bone sa L4L-Award kwa Amsterdam kwa lefatsheng la Netherlands. Seetsele se o ne e ase neelwa ke mmueledi wa kwa Columbia Jorge Molano, o neng a se fentse ka ngwaga wa 2015. E ne e le lantlha seetsele se se fenngwa ke mosadi.