Go thopa ka dikgoka

human trafficking

GO THOPA KA DIKGOKA: RE SUPA MANG KA MONWANA?

KA: OTHUSITSE MOSES LOBELO

“Go begwa fa mosadi a nyeletse le go ya ka lenga la seloko matsatsi a le mmalwa a a fetileng. Mosadi yo, o tswile kwa lapeng ka lamatlhatso mo mesong a itsise balelapa fa a leba kwa tikwatikweng ya marekelo go ya go dira mabaka a selegae. Balosika le ditsala ba belaela fa a thopilwe ka dikgoka ke bao ba gwebang ka batho.” Mafoko ano re a utlwa kgapetsakgapetsa, letsatsi le letsatsi mo diyalemongweng, dithelebišeneng le maranyane a loago. Mo matsatsing a, motho o setse a utswega bonolo fela jaaka koko mo Aforika Borwa

Go thopiwa ka dikgoka mo Aforika borwa go setse go fetogile selo modiro. Go ya ka pegelo ya Unibesithi ya Johannesburg, e kaya fa bontsi jwa batho ba ba thopiwang ka dikgoka e le basadi le basetsana ka diphesente di le 55.5% mme palogotlhe ya banna e le 44,5%. Bangwe ba ratelwa ke bathapi ba maaka ba ba solofetsa ditiro, e le fela go ba beela serai sa go ba thopa. Bontsi jwa nako ba thopiwa jaana e le go diriwa makgoba a thobalano le go patelediwa mo manyalong ba sa le bannye go akaretsa go tsenngwa mo ditirong ntle le tuelo. Go mokgwa mongwe wa go thopa ka dikgoka wa sešweng, go thopa motho ka maikaelelo a go gama le go anya madi mo go balosika.

Dipalopalo tsa go thopiwa ka dikgoka di gola letsatsi le letsatsi mo Aforika Borwa, mme e kete puso ga e dire go tlala seatla go thibela se. Go mekgatlho e le mmalwa jaaka ‘Love Justice Team’ e e dirisang thekenoloji ya sejaanong go ratela le go tshwara magodu ano, mme go lebega mekgatlho eno e sa bone kemonokeng e e lekaneng go tswa kwa pusong go samagana le go thopa ka dikgoka. Tlala le lehuma, maemo a sepolotiki le ekonomi a a tekatekang, botlhokatiro le melelwane ya naga e e sa laolosegeng. Fa puso e ka ela seno tlhoko, go thopa ka dikgoka go ka fetoga go nna puo ya maloba.