Setswana

Setswana ke puo ee buiwang mo mafatsheng a Aforika Borwa, Botswana, Namibia le Zimbabwe. Ke nngwe ya dipuo tsa semmuso kwa Aforika Borwa fa kwa Botswana gone e le puo ee tsewang e le yone ya lefatshe ka bophara. Banni bangwe ba Botswana ba tsalwa ba sa bue Setswana jaaka Bakgalagadi, Bakalaka le ba bangwe. Ba se ithuta mo mebileng le ko sekolong.

Setswana se sikana thata le Sesotho, puo e e buiwang ko Aforika Borwa le Lesotho. Se se dira gore babui ba dipuo tse ba tlhaloganyane motlhofo go gaisa ba dipuo tse dingwe tse di mabapi.

Bontsi jwa batho ba ba buang Setswana ba fitlhelwa kwa lefatsheng la Aforika Borwa bogolo segolo mo diporofenseng tsa Bokone Bophirima (North West) le Kapa Bokone. Batswana ba Aforika Borwa ba ka nna didikadike di le 3.4 fa Batswana ba Botswana ba ka nna sedikadike le go feta (gongwe 1.3). Batswana ba Namibia le Ba Zimbabwe ba palo potlana. Legale ditirelo tsa kgaso tsa Namibia di gasa gape ka Setswana.

Setswana ke puo ee monatenate, ee nonneng ka e bile e buiwa mo mafatsheng a mane a a mo borwa jwa Aforika. Baithuti bangwe ba dipuo bare Setswana ke nngwe ya dipuo tse di matswakabele thata go gaisa tse dingwe tsa borwa jwa Aforika.

Setswana se na le manatetsha puo a mantsi jaaka diane, dithamalakwane le maele.