Lefelo la Tsodilo

Dithaba Tsa Tsodilo ( Tempolete:Langx ) ke Lefelo la Ngwaoboswa ya Lefatshe Lotlhe la UNESCO( WHS ), le le nang le botaki jwa matlapa, mafelo a a sireletsegileng a matlapa, dikhuti le magaga mo Botswana, kwa Borwa jwa Aforika .

Le ne la tsenngwa lantlha mo lenaneong la WHS ka 2001 ka ntlha ya botlhokwa jwa lone jo bo kgethegileng jwa bodumedi le bokao jwa tsa semoya mo bathong ba lefelo le, ga mmogo le kgatiso ya lone e e kgethegileng ya go nna ga batho teng mo dingwageng di le sekete tse dintsi. UNESCO e akanyetsa gore go na le ditshwantsho tse di takilweng mo mantsweng tse di fetang dikete di le nne le makgolo a le matlhano mo lefelong le. Lefelo le le na le dithaba di le mmalwa tse dikgolo tse di bidiwang Thaba ya Ngwana, Thaba ya Mosadi le Thaba ya Monna.

Kitso ka popego ya lefelo

Moalo wa lefatshe la Botswana

Go na le dithaba tse ditona di le nne. E e kwa godimo go di feta e na le dimithara di le sekete le makgolo a le mane AMSL, e leng nngwe ya dintlha tse di kwa godimo mo Botswana. Dithaba tse nne tse di tlwaelesegile ka go tlhalosiwa jaaka la "Monna" (le le kwa godimo go a feta), "Mosadi", "Ngwana", gammogo le tlhojana e e senang leina. Di ka nna sekgala sa dikholomithara di le masome a le mane go tswa kwa Shakawe mme go ka gorogiwa kwa go tsone go dirisiwa tsela ya mmu e e nang le maemo a a siameng.

Go na le lefelo la go kampa le le nang le bookamedi fa gare ga dithaba tse pedi tse di tona, le na le matlhapelo le matlwana a boithomelo. Le gaufi le ditshwantsho tse di tumileng thata tsa Basarwa mo lefelong le, e leng phanele ya ga Laurens van der Post , le teeletswe morago ga mokwadi wa MoAforikaborwa yo o neng a tlhalosa ditshwantsho tse la ntlha mo bukeng ya gagwe ya 1958 ya The Lost World of the Kalahari . Go na le Ntlo ya ditso e e potlana le lebala la difofane gaufi le lefelo le la go kampa.

Thuto ka matlapa

Phanele ya Laurens van der, 2006

Batho ba dirisitse mantswe a dithaba tsa Tsodilo go taka le go tshwarela ditiro tsa ditumelo tsa bone dingwaga di le diketekete. Palo kakanyetso ya UNESCO e supa fa dithaba tse di na le mafelo a le makgolo a le matlhano a a ikemetseng ka bongwe a a kayang dingwaga di le diketekete tsa bonno jwa batho. Botaki jwa matlapa mo dithabeng tse bo ile jwa golaganngwa le batsomi ba ba bapalang ba lefelo le. Go dumelwa gore Badimo ba ba Basarwa ba takile dingwe tsa ditshwantsho tse di takilweng kwa Tsodilo, mme gape e ne e le bone ba ba neng ba tla ba nna mo magageng le mo mantsweng. Go na le bosupi jwa gore batho ba Bantu ke beng ba ditiro dingwe tsa botaki kwa dithabeng tse. Dingwe tsa ditshwantsho tse di ile tsa supiwa gore di ne di le teng dingwaga di le dikete di le masome a mabedi le bone pele ga gompieno.

Logaga lwa Tshukudu

Logaga lwa Tshukudu lo kwa ntlheng ya Bokone jwa Thaba ya Mosadi mme le na le mabota a mabedi a matona kwa ditshwantsho tse di takilweng di leng teng. Setshwantsho sa Tshukudu e Tshweu ( se logaga lo reeletsweng morago ga sone ) se mo leboteng le le kwa bokone, mme se kgaogantswe ke setshwantsho se sengwe sa Thutlwa . Fa go ne go epiwa bodilo jwa logaga go ne ga fitlhelwa dilo tse dintsi tsa matlapa. Logaga lo ga lo na kgapetlana ya lee la ntŝhe, dilo tsa marapo tse di dirilweng ka diatla, mmopa kgotsa tshipi, fela go ne go na le dikarolwana di le mmalwa tsa kgapetlana ya mongongo tse di fitlhetsweng mo dikarolong tsa Motlha wa Letlapa wa Moragonyana .

Botaki jwa Thutlwa mo Letlapeng: Dithaba tsa Tsodilo

Magala a a fitlhetsweng ka nako ya go epa a ile a bewa gore ke a Motlha wa Tshipi wa Aforika, Motlha wa Leje la Moragonyana (LSA), le Motlha wa Leje la Bogare (MSA). Bontsi jwa dilo tsa mantswe tse di dirilweng ka diatla go tswa kwa LSA di ne di dirilwe ka didirisiwa tsa lefelo le jaaka quartz le jasper. Dilo tsa MSA tse di dirilweng ka diatla go tswa mo logageng ke dintlha tsa porojekethaele tse di baakantsweng. Dintlha tse di tlwaelesegile go fitlhelwa mo dikgatong tse di farologaneng tsa go dirwa, tse dingwe di tlogetswe di sa felelela mme tse dingwe di feditswe.

Ditshwantsho tsa Logaga lwa Tshukudu di fitlhelwa thata mo leboteng la Bokone, mme di pentilwe ka mmala o mohibidu kgotsa o mohibidu-wa namune, ntle le tshukudu e e neng e pentilwe ka bosweu. Go dikologa tshukudu le thutlwa go na le ditshwantsho tse di farologaneng, bontsi jwa tsone di le bohibidu, tsa jiomethirikisi. Mo leboteng le le bapileng le lone, logaga lo na le mesima le dikhuti tse di epilweng mo lentsweng. E ka tswa e epilwe ka go dirisa matlapa a a epang kgotsa matlapa a a silang go tswa mo pakeng ya LSA, a a fitlhetsweng kwa Tsodilo.

Ditshwantsho Tse Di Tshweu

Papiso ya Botaki jwa Mantswe a Mahibidu le a Masweu kwa Tsodilo

Botaki jwa letlapa jwa mmala o mosweu kwa Tsodilo bo amanngwa le merafe ya Bantu . Bontsi jwa ditshwantsho tse ditshweu di fitlhelwa mo Lefelong la White Paintings le le biditsweng go tsamaelana, le le mo Thabeng ya Monna. (Go na le ditshwantsho tse dikhibidu mo lefelong le la tshireletso, gape.) Ditshwantsho tse ditshweu di supa diphologolo, tsa mo gae le tsa naga, ga mmogo le ditshwantsho tse di bopegileng go tswana le batho. Ditshwantsho tse di bopegileng jaaka batho gantsi di pentiwa di beile diatla mo dinokeng. Bonnye tsa tsone di supa batho ba palame dipitse, se se kayang gore tse di ne di pentilwe e seng pele ga bogareng jwa dingwaga tsa bo 1800, fa dipitse di ne di tsisiwa la ntlha mo lefelong le.

Tse di tserweng mo magaleng, kgapetlana ya lee la ntŝhe, disampole tsa marapo le masalela di ne di supa dingwaga go simolola ka MSA go ya go LSA. (Go na le bosupi gape jwa gore lefelo le le ne le dirisiwa ka nako ya ditso: konopo ya nylon le dibaga tsa galase tsa Yuropa di ne tsa fitlhelwa mo dikarolong tse di kwa godimo mo mesimeng e e epilweng mo lefelong le. ) Masalela a LSA a ne a akaretsa matlapa a a epang le matlapa a go sila, mmogo le dilo tse di dirilweng ka diatla tsa marapo le matlapa a mannye. Maphatlo a tsa tse di dirilweng ka letsopa, dibaga tsa dikgapetlana tsa mae a ntŝhe le dikgapetlana tsa mongongo le tsone di ne tsa bonwa. Masalela a tsa MSA a ne akaretsa matlapa a a segang mmogo le didirisiwa tse dingwe tsa matlapa.

Ditshwantsho tse di Khibidu

Diphologolo tsa botaki jwa matlapa

Dithaba tsa Tsodilo di na le botaki jo bontsintsi jwa letlapa le lehibidu; bo ka bonwa mo lefelong lotlhe. Kwa Logageng la Tshukudu, ditshwantsho dingwe tse dikhibidu di lebega di le bogologolo go feta tshukudu e tshweu. Ditshwantsho tse di takilweng tse dikhibidu fa, le go dikologa Tsodilo, di bolelwa gore ke tsa Basarwa .

Lefelo la Depression Rock (lentswe le le kwa tlase)

Setshwantsho se sehibidu sa tshukudu

Ditshukudu le sebopego se se tshwanang le kgomo

Ditshwantsho tse di takilweng ka bohibidu jo bo nyeletseng kwa Tsodilo

Le fitlhelwa ka fa letlhakoreng la bokonebophirima jwa Thaba ya Mosadi, lefelo le le tsere leina la lone go tswa mo dikhuting tse di epilweng mo maboteng a lefelo le. Matshwao a a patilwe ke ditshwantsho tse dikhibidu tse go lebegang e le dikgomo, gammogo le ditshwantsho tsa jiomethiri. Lefelo le la tshireletso ya matlapa, le le supiwang dinako tsa lone go tswa mo disampoleng tsa magala, go ne ga nniwa lantlha mo go lone mo dingwageng di ka nna bonnye jwa dikete di le masome a le mararo tse di fetileng. Go epilwe didirisiwa tsa matlapa tsa LSA le dilo tse di dirilweng ka diatla tsa Motlha wa Tshipi.

Dilo tsa letsopa tse di fitlhetsweng mo dikarolong tse di kwa teng thata di ne tsa supiwa e le tsa lekgolo la ntlha la dingwaga , mme di amana le dilo tsa bogologolo thata tsa matlapa tse di fitlhetsweng mo lefelong le. Dikgapetlana tsa manoko a Mongongo le tsone di ne tsa bonwa mo masaleleng a a farologaneng, go akaretsa le dikarolo tse di kwa teng thata, se se dirang gore e nne manoko a mongongo a bogologolo go gaisa a a kileng a bonwa mo go tsotlhe tsa go epiwa ga dilo tsa bogologolo.

Thuto ya tshipi

Dithaba tsa Tsodilo di dirilwe ke mafelo a le mmalwa a go epiwa ga dilo tsa bogologolo. Mafelo a le mabedi mo go a, a a itsegeng jaaka Divuyu le Nqoma, a na le bosupi jwa dilo tsa tshipi tsa Motlha wa Pele wa Tshipi Tse di epolotsweng mo mafelong a mabedi a di ne di na le dikarolwana tsa didirisiwa tsa tshipi, tsotlhe di dirilwe ka tshipi le/kgotsa kopore. Dikarolo tsa makgabisa e ne e le tsa dibaga, , dikeetane le manyena mme didirisiwa di ne di akaretsa di- chesele, di- projectile le metswi ya digai, le magare tota. Mafelo a mabedi a a tswana ka maranyane a go dira didirisiwa di, mme a na le mefuta e e farologaneng ya go bereka tshipi. Slag le tuyères di lebega di supa gore Divuyu le Nqoma e ka tswa e ne e le mafelo a go nyerolosa tshipi, mme se se dira gore e nne nngwe ya mafelo a le mmalwa a Motlha wa Tshipi wa Pele mo borwa jwa Afrika a a nang le bosupi jwa go dira tshipi.

Bokao jwa Ngwao

Dithaba tse di na le bokao jo bogolo jwa ngwao le jwa semoya mo bathong ba Basarwa ba Kalahari. Ba dumela gore dithaba tse ke lefelo la boikhutso la mewa ya baswi le gore mewa e e tlaa baka matlhotlhapelo le go tlhoka lesego fa mongwe a ka tsoma kgotsa a baka loso gaufi le tsone. Tsodilo gape ke kgang e go ngangisanwang ka yone mabapi le ka fa Basarwa ba kileng ba bo ba tshela ka teng.

Tsodilo Hills mo Bokone Bophirima jwa Botswana.

Ithunthuntso ya setso ka puo

Batho ba le bantsi ba lefelo le go dikologa dithaba tsa Tsodilo ba na le dipolelo tsa dinako tse di fetileng tse di buang ka magaga a mantsi a a takilweng le mafelo a tshireletso a matlapa mo lefelong le. Dithuto tse tsa puo gantsi di bolela ka batho ba Zhu, setlhopha sa Basarwa, ba dirisa mafelo a tshireletso a matlapa go itshireletsa mo dielementeng kgotsa jaaka mafelo a dingwao.

Ditshwantsho tse di takilweng mo letlapeng

Nngwe ya dipolelo tse e bolela gore batsomi ba ne ba tla mo mafelong a a sireleditsweng mo mantsweng go ikgolaganya le Badimo fa letsomo le ne le sa atlega. Ba ne ba tla bo ba kopa letsomo le le siameng nako e e tlang fa ba tswa. Ka go leboga, fa letsomo le atlegile, batho ba ne ba tla bo ba boela kwa lefelong le la tshireletso mme ba apeela Badimo ba bone. Mo mangweng a mafelo a a neng a bolelwa e le a kampa, ga go na bosupi jo bontsi jwa masalela a molelo.

Mme fela, go na le mafelo a go dirwang ditiro tsa tumelo tse di tshwanang le dithapelo tsa go dira pula. Bagolo ba mo lefelong le ba sa ntse ba gakologelwa ba dirisa mafelo mangwe a a sireletsegileng a matlapa jaaka mafelo a go kampa fa ba sa ntse ba le bana. Lefelo la tshireletso la letlapa la Whites Paintings le ka tswa le ne le dirisiwa jaaka kampa ka paka ya dipula go tloga ka dingwaga di le masome a le bosupa go ya kwa go di le masome a le boferabobedi tse di fetileng.

Batho ba lefelo le ba Basarwa ba dumela gore Tsodilo ke botsalo jwa botshelo jotlhe le botaki koo bo dirilwe ke dikokomane tsa batho ba ntlha. Thuto ka popego ya Tsodilo, ditselana le dikhuti mo lefatsheng di itsege jaaka ditselana le dikgato tsa diphologolo tsa ntlha, di dira tsela ya tsone go ya kwa mosimeng wa ntlha wa metsi ). Motswedi wa metsi wa tlholego kwa Tsodilo, gaufi le Thaba ya Mosadi, o dirisiwa jaaka lefelo la go beeletsa metsi le lefelo la ditiro tsa tumelo. O bonwa o le boitshepo, mme o dirisiwa ke batho ba le bantsintsi go iphepafatsa, go fodisa le go sireletsa.

Kitso ye nngwe

• Ursula Erasmus (1992) Bushman Culture , published by Excalibur, 315 pp ISBN 1856341917
• C. Michael Hogan (2008) Makgadikgadi , The Megalithic Portal, ed. A. Burnham
• Luis Pancorbo (2000) "Al fin las colinas de Tsodilo" en "Tiempo de África". Pp. 280-286. Laertes, Barcelona. ISBN 84-7584-438-3
• Sheila Coulson, Sigrid Staurset, and Nick Walker (2011) "Ritualized Behavior in the Middle Stone Age: Evidence from Rhino Cave, Tsodilo Hills, Botswana" PaleoAnthropology 2011:18-61

Polelo ya tiro ya tumelo ya ntlha

Nonyane ya metsi ya Tsodilo, setshwantsho se se takilweng se se tshwanang le nonyane

Ka 2006 lefelo le le bidiwang Logaga la Tshukudu le ne la itsege thata mo metsweding ya dikgang fa Sheila Coulson wa Sekolo sa dithuto tse dikgolwane sa Oslo a ne a bolela gore go bonwe didirisiwa tse di dirilweng ka diatla tse di nang le dingwaga di le dikete di le masome a le supa le lentswe le le tshwanang le tlhogo ya tlhware le le supang go tshwarwa ga tiro ya tumelo ya ntlha e e itsiweng ya batho. O ne a nonotsha tlhaloso ya gagwe ya gore lefelo le ke le go tshwarelwang ditiro tsa tumelo mo go lone a lebile diphologolo tse dingwe tse di tshwantshitsweng: "Mo logageng, re fitlhela fela diphologolo tse tharo tse di botlhokwa thata mo bathong ba Basarwa; tlhware, tlou, le thutlwa. Fa e sa le foo bangwe ba baithutamatlapa le ba ba neng ba amega mo dipatlisisong tsa ntlha tsa lefelo le ka 1995 le 1996 ba ne ba botsolosa ditlhaloso tse. Ba supa fa dikgang tse (tse di itsegeng ke baithutamatlapa jaaka di-cupule) tse di tlhalosiwang ke Coulson gore ga se tsotlhe tse di simolotseng ka nako e le nngwe le gore "bontsi jwa dikhuti di santse di le boteng fa tse dingwe di khurumeditswe ke patina e e bokete."" Mafelo a mangwe a a gaufi (a a fetang masome a mabedi) le one a na le dikhuti mme ga a supe diphologolo. Marang a radiocarbon le a thermoluminescence a Motlha wa Bogare wa Letlapa a lefelo le ga a tshegetse palo ya dingwaga di le dikete di le masome a le supa, se se akantshang gore ke a dingwaga tse di gautswane.

Fa ba buisana ka setshwantsho se se takilweng, baithutamatlapa ba re setshwantsho se se tlhalosiwang jaaka tlou ke tshukudu, gore setshwantsho se sehibidu sa thutlwa ga se sa bogologolo go feta 400 AD le gore setshwantsho se sesweu sa tshukudu ke sa bosheng, le gore baitseanape ba botaki jwa matlapa ba dumela gore ditshwantsho tse dikhibidu le tse ditshweu ke tsa ditlhopha tse di farologaneng. Ba kaya tlhaloso ya ga Coulson jaaka ponelopele ya ditumelo tsa segompieno go ya kwa nakong e e fetileng mme ba bitsa tlhaloso ya ga Coulson kgang e e kopantsweng e e "tsietsang thata". Ba araba polelo ya ga Coulson ya gore tse ke tsone fela ditshwantsho tse di takilweng mo logageng ka go bolela gore o itlhokomolositse ditshwantsho tse dikhibidu tsa jometeri tse di fitlhetsweng mo leboteng la logaga.

Ba boa gape ba buisana ka dintlha tse di fisitsweng tsa Motlha wa Letlapa wa Bogare, ba bolela gore ga go na sepe se se sa tlwaelegang mo go diriseng dilo tse e seng tsa lefelo le. Ba kgaphela thoko kgang ya gore ga go a fitlhelwa didirisiwa dipe tse di tlwaelegileng mo lefelong le, ba bolelagore di- scraper tse dintsi tse di fitlhelwang ke didirisiwa tse di tlwaelegileng le gore go na le bosupi jwa gore go ne go dirwa didirisiwa mo lefelong le. Fa ba buisana ka ‘phaposi ya sephiri’, ba supa go tlhoka bosupi jwa gore dingaka tsa Basarwa di dirisa diphaposi mo magageng kgotsa gore e e dirisitswe ka tsela e e ntseng jalo.

Dipadi tse dingwe

• Tsodilo - Lefelo la ngwao boswa ya lefatshe ka bophara UNESCO