Moremi Game Reserve

Tlou e kgabaganya tsela kwa lefelo la diphologolo la Moremi

Lefelo la Diphologolo la Moremi ke lefelo le le sireleditsweng mo Botswana. Le kwa botlhaba jwa noka ya Okavango. Leina le lefelo le le le filweng ke la ga Kgosi Moremi wa baTawana. Moremi o ne a agilwe ka leano la gore e nne lefelo le go tla nnang diphologolo mo go lone, e seng lefelo la puso. Se se ne se raya gore Basarwa ba ba neng ba nna kwa go lone, ba ne ba letlelelwa go tswelela ba nna mo go lone.

Lefelo

Tau e namagadi kwa lefelong la diphologolo la Moremi Game Reserve

Lengau le tsamaya mo bojannyeng

Moremi Game Reserve e botona jwa di kilomithara di le dikete tse tlhano, e apesitse bontlha jo bogolo jwa botlhaba jwa noka ya Okavango, se se tlhakanya metsi a se nnela ruri a a foo le fa go omeletseng, mme se se supa pharologanyo e tona. Mafelo a a tumileng thata mo lefelong le ke Chiefs Island le Moremi Tongue. Kwa Moremi Game Reserve motho o ka itemogela bontle jwa savannah game le go lebelela dinonyane mo lekadibeng. Go na gape le naga e e kitlaneng e go nnang mo go yone dintsa tsa naga le mangau. Kwa bokonebotlhaba go na le Chobe National Park e le leng mo molelwaneng wa Moremi Game Reserve.

Ditlhare le Diphologolo

Le ntswa Moremi Game Reserve e se lengwe la diparaka tse dikgolo, e kgatlhisa leitlho la bajanala ba tlhwatlhwa. Dilo tse di mo lefelong le di farologane, di akaretsa ditlhare tsa mophane, dikgwa tsa ditlhare tsa mokala, makadiba le matsha. Mefuta ya dinonyane e le makgolo a matlhano le diphologolo tse dingwe tsa naga jaaka ditau, mangau, ditlou, dinare, ditshukudu,dikubu,dipitse tsa naga, dithutlwa,dikgokong,matlotse,bophokoje,dikolobe tsa naga, le diphala di teng mo lefelong le. Lefelo la Moremi le itsege le nna dintsa tsa naga thata mo bontsi jwa tsone bo neng jwa dirisiwa mo dipatlisisong go tswa ka ngwaga wa sekete,makgolo a robabongwe le masome a robabobedi le borobabongwe;ka jalo bontsi jwa tsone bo apesitswe mabante mo thamong.

Ditso

Lefelo le le ne la tlhomiwa go nna reserve ka ngwaga wa sekete,makgolo a robabobgwe le masome a marataro le boraro, le biditswe jaaka Kgosi Moremi wa boraro wa morafe wa baTawana ba kgaolo ya Ngamiland. Motlholagadi wa ga kgosi Moremi e bong Elizabeth Pulane Moremi, o neng a eteletse pele lefelo le ka anko eo, o ne a tsaya kgato ya go babalela diphologolo tse di mo lefelong le ka o ne a tshwenyegile ka go tsoma mo go neng go fokotsa palo ya tsone.

Dipalamo

Moremi Xakanaxa maemo a bosa a pula

Lefelo leno le na le ditshono tse dintsi tsa go le bona o tsamaya ka maoto le ka mokoro - mokoro o o gabilweng o dirwa ka logong lwa ebony kgotsa logong lwa boroso mme o kgweediwa ke mokaedi wa gago. Le fa go ntse jalo, gompieno mekoro e le mentsi (bontsi jwa mokoro), e dirilwe ka fiberglass, ka jalo e thusa go boloka ditlhare tse dintle le tse di godileng tsa lefelo leo.

Go bonwa diphologolo tsa naga thata go tloga ka kgwedi ya Phukwi go ya go Phalane , ka nako ya fa metsi a a leng teng ka paka e e rileng a kgala mme diphologolo tsa naga di bo di nna mo metsing a a nnang a le teng ka metlha. Go simolola ka kgwedi ya Phalane go fitlha dipula di na kwa bofelong jwa kgwedi ya Ngwanatsele kgotsa mo masimologong a Morule, go ka nna mogote thata.

Dintshi tse di tshwaetsang malaria di aname mo Reserve yotlhe mme go akantshiwa thata gore baeti ba tshwanetse go nna kelotlhoko pele ga ba etela, ka nako ya fa ba etile le morago ga foo.

Botswana e ile ya kgona go tlhabolola bojanala jwa yone kwantle ga gore e tlhoke madi a mantsi a dinaga tse dingwe tsa Afrika di a tlhokang. Leano la bojanala jwa tikologo le le nang le poelo e e kwa godimo, mme le na le ditlamorago tse di kwa tlase, le dirile gore bajanala ba kgone go bona Afrika e le mo maemong a yone a tlholego, a a sa senngwang le a a kgatlhang. Ka jalo, Reserve ka boyone e na le matlo a mannye fela a bonno, mme go na le mafelo a le manè fela a a beetsweng kwa thoko go ka thibelela mo go one (kwa South Gate, Third Bridge, Xakanaxa, le Khwai). Go na le mafelo a le mmalwa a bonno kwa ntle ga lefelo le, a bajanala ba one ba yang kwa go one letsatsi le letsatsi go ya go bona diphologolo.

Go tsamaya fa gare ga di-lodge go dirwa ka sefofane se se motlhofo le ka dihelikopotara, ka gonne di-lodge di le dintsi di na le mafelo a tsone a go fofa. Ka jalo, o ka kgona go kopanya dikago di le mmalwa tsa bonno mo mafelong a a farologaneng. Go na le difofane tsa go lebelela metshameko ka dihelikopotara go tswa mo matlong a bonno a le mantsi.

Ditsela

Ditsela tse di mo Moremi Game Reserve di fetoga thata go ikaegile ka dipaka le metsi a Letsha. Fa metsi a morwalela a le kwa godimo, ditsela dingwe di tlala metsi mme mafelo a a tletseng motlhaba a thata go tsamaya mo go one ka dikgwedi tse di mogote tsa selemo. Lefelo la Moremi Game Reserve ke serapa se se se nang dikotsi tse dintsi, se se rayang gore ga go na dikoloi tse dintsi le batho ba le bantsi mo lefelong leno. Seno se molemo thata fa o batla go bona diphologolo ka gonne gantsi o a bo o le nosi fa o di bona, mme gape go raya gore ga go motlhofo go bona thuso fa o le kgakala le ditsela tse dikgolo. Tlhomamisa gore o na le sedirisiwa se se lekaneng sa go iphalotsa mme o itse gore o ka se dirisa jang, mme o tla tlhoka sekgoge mo koloing ya gago fa o kgabaganya metsi. Fa o kgweetsa serori se se hirilweng, tlhatlhoba melao le melawana ya khampani e e go hirisang malebana le go kgweetsa mo metsing.

Go tsomiwa ga Diphologolo

Go tloga ka kgwedi ya Motsheganong ngwaga wa dikete tse pedi,lesome le borobabongwe, go tsoma ka dikgoka go oketsegile ka selekanyo se se tshosang mo lefelong leno. Mekgatlho e e rulagantsweng ya go tsoma ka bokukuntshwane e bolaile dinare di le masome a mane le borataro mo dikgweding di le lesome, e leng mo e ka nnang diperesente di le lesome tsa dinare di le makgolo a matlhano tsa Botswana. Badiredibagolo ba ne ba boifa gore mefuta eno e mebedi ya ditshukudu e ne e tla nyelela, ka gonne bontsi jwa ditshukudu tsa kwa Botswana di nna mo dipoeng tse di nang le bojang kwa bokone jwa Okavango Delta, kwa Moremi Game Reserve e leng gone. Go tsomiwa ga dinaka tsa ditshukudu ka bokukuntshwane go dirwa ke go batla dinaka tsa ditshukudu tse di sa kgaleng, tse di jang $60,000/kg.