Mohumagatsana Charlotte wa kwa Wales

Princess Charlotte
Princess Charlotte ka ngwaga wa 2022
Tsalo	Princess Charlotte of Cambridge 2015|5|2 St Mary's Hospital, London, England
Batsadis	William, Prince of Wales (father) Catherine Middleton (mother)
Masika	Prince George of Wales, brother Prince Louis of Wales, brother

Mohumagatsana Charlotte wa kwa Wales o o tshotsweng ka ngwaga wa 2015, kgwedi ya Motsheganong e le malatsi a le mabedi, ke leloko la lolwapa lwa bogosi lwa kwa Britain. Ke ngwana wa bobedi gape e le ene fela mosetsana wa ga Kgosana William le mohumagatsana Catherine ba kwa Wales. Ke ngwana-wa-ngwana wa ga Kgosi Charles wa boraro, o mo maemong a boraro a tatelano ya bogosi jwa kwa Britain.

Fa a santse a le losea

Mohumagatsana Charlotte o tshotswe ka Kgwedi ya Motsheganong e le malatsi a mabedi ka ngwaga wa 2015 kwa sepateleng sa St Mary's kwa Lontone. Nako e ne e le ya masome a mararo le bone morago ga borobabobedi mo mosong, ka nako e mmagwemogolo mo lotlhakoreng lwa ga rragwe, ebong Queen Elizabeth wa bobedi a neng a santse a busa. Ke ngwaga wa bobedi wa ga Kgosana William le Catherine, ba ka nako eo ba neng ba itsege ka Duke le Dutchess ba kwa Cambridge. Matsalo a gagwe a ne a supiwa ka go thuntshiwa ga ditlhobolo le go kgabisa mafelo a a botlhokwa ka mmala o o pinki. Ka kgwedi ya Motsheganong e le malatsi a le mane, leina la gagwe la Charlotte Elizabeth Diana le ne la bolelwa, e le go supa tlotla mo go rragwemogolo Charles, mmagwe-mogolwagolwane, le mmagwemogolo Diana, kgosatsana ya kwa Wales. Charlotte o ne a kolobediwa ka Phukwi a le malatsi a matlhano ke Archbishop Justin Welby kwa kerekeng ya St Mary Magdalene kwa Sandringham.

Kgodiso ya gagwe

Charlotte le batsadi ba gagwe le bo kgaitsadie kwa setupung sa ntlo ya bogosi ya kwa Buckingham kwa moletlong wa matsalo a ga Queen Elizabeth ka ngwaga wa 2019

Lolwapa lo nnile kwa Anmer Hall kwa Norfolk ka nako ya Charlotte a santse a le losea, pele ga ba fudugela kwa ntlong ya bogosi ya Kensington ka ngwaga wa 2017. Charlotte o ne a simolola sekolo sa bananyana kwa Willcocks Nursery School ka Firikgong 2018. O ne a ya go tsena kwa sekolong se kgaitsadie George a neng a se tsena sa Thomas's School kwa Battersea kwa Lwetse ngwaga wa 2019 kwa a neng a dirisa leina la Charlotte Cambridge. Ka ngwaga wa 2022, lolwapa lo ne lwa fudugela kwa Adelaide kwa Windsor Home Park, kwa ene le bo kgaitsadie ba neng ba tsena sekolo kwa Lambrook, sekolo se se ikemetseng se se kwa Berkshire.

Ka Lwetse a le malatsi a robabobedi ngwaga wa 2022, nkukuagwe Charlotte ebong Elizabeth wa bobedi o ne a tlhokafala, mme a tlhatlhangwa ke ntateagwe Charles wa boraro. Charlotte o ne a nna wa boraro mo tatelanong ya bogosi. Charlotte le bokgaitsadie gangwe le gape ba tsamaya le batsadi ba bone mo ditirong tsa bogosi, maeto le tsa botsalano le mafatshe a mangwe.

Tebego mo sechabeng

Le ntswa batsadi ba gagwe ba lekile go ba ntsha mo matlhong a sechaba, dinepe le go tlhagelela ga ga Charlotte mo sechabeng go tsweletse ka go baka kgatlhego mo babegadikgangeng. Dipalo tsa theko le dipotsoloso mo batsadiing di supa gore Charlotte ke motlhotlheletsi wa tsa kapari ya bana.

Maemo le mekgwa

Charlotte ke mohumagatsana wa kwa Britain o maemo a gagwe e leng "Her Royal Highness, Princess Charlotte of Wales". Pele ga rragwe a nna kgosana ya Wales ka Lwetse 2022, Charlotte o ne a itsege ka "Her Royal Highness Princess Charlotte of Cambridge."

Tatelano

Charlotte o mo maemong a boraro a bogosi jwa kwa Britain, o setse morago rragwe le kgaitsadie. Ka ntlha ya tumalano ya Perthe e neng ya emelela go tlhopha bana ba basimane, o ne a seka a ya kwa tlase fa kgaitsadie o monnye Louis a tsholwa ka Mopitlo 2018, se se mo dira mohumagatsana wa ntlha wa kwa Britain mo ditsong go nna mo maemong a a kwa godimo ga a ga kgaitsadie.

Kitso Tlaleletso

• Setlhare sa lolwapa lwa bogosi jwa kwa Britain
• Dikgosana le bahumagatsana ba ba santseng ba tshela ba kwa Britain