Jump to content

Air Botswana

Go tswa ko Wikipedia
Sekano ya Air Botswana

Koporase ya Air Botswana ke yone e e letleletsweng ke Goromente wa Botswana go tsamaisa le go okamela mesepele ya difofane mo lefatsheng la Botswana, ntlokgolo ya yone e mo Gaborone. [1][2] E laola difofane tsa mo gae le tsa mo kgaolong e go tswa kwa e tlhomilweng teng kwa Sir Seretse Khama International Airport.[3] Go na le dingwaga di le mmalwa Air Botswana e sa dire sentle mo go tsa kgwebo, mme go lekilwe makgetho a le mantsi go fetola kompone gore e sa tlhole e laolwa ke puso, le go fetola bagogi le maloko a boeteledipele jwa koporase mme se ga se a fokotsa ditatlhegelo.[4]

Ditso

[fetola | Fetola Motswedi]

Dingwaga tsa tshimologo (1972-1986)

[fetola | Fetola Motswedi]

Air Botswana(Pty) Limited e simolodisitswe ka kgwedi ya Phukwi e tlhola malatsi a le mabedi ka ngwaga wa sekete, makgolo a robabongwe, masome a supa le bobedi, e tsweledisa tiro e e simolotsweng ke dikompone tsa difofane tsa sechaba tse di reteletsweng pele ebong: Botswana National Airways (go tswa ka ngwaga wa sekete, makgolo a robabongwe, masome a marataro le borataro go tsena ka wa sekete, makgolo a robabongwe, masome a marataro le borobabongwe), le Botswana Airways Corporation (go tswa ka ngwaga wa sekete, makgolo a robabongwe, masome a supa go tsena ka ngwaga wa sekete, makgolo a robabongwe, masome a supa le motso). [5] Air Botswana Holdings e ne e tsere maikarabelo a go laola le go etelela pele kadimiso ya difofane le go nna yone e e etelelang pele Air Botswana. mo dingwageng tsa fa e santse e simolola, Air Botswana (Pty) Limited e ne ele yone e tshwereng dikonteraka tsa ditirelo tsa difofane ka bontsi, tse di neng di adimilwe ba South African Protea Airways, ka tiriso ya lekalana la Air Services Botswana.[6][7]

Go fofa ga difofane go simologile ka Phatwe a tlhola gangwe ngwaga wa sekete, makgolo a robabongwe, masome a supa le bobedi, go dirisiwa sefofane sa Fokker F-27 Friendship se e neng ele sone fela sa kompone ka nako eo. Mo dingwageng tsotlhe tsa dingwaga tsa sekete, makgolo a robabongwe le masome a supa, Air Botswana e ne e na le mosepele wa go ya o boelela mo tseleng ya Gaborone- Manzini-Johannesburg-Harare-Gaborone fa godimo ga mesepele ya mo gae ya go ya Francistown, Maun le Selibe-Phikwe. Fa dingwaga tsa 1970 di ya fifing, Air Botswana e ne e dirisa sefofane se le sengwe sa HS 748, se le sengwe sa Douglas DC-3, le se le sengwe sa Vickers Viscount 754 se se neng se firisitswe mo go ba Protea Airways.[7]

Tumalano ya ba Air Services Botswana e ne ya seka ya ntshafadiwa, mme ya re ka ngwaga wa sekete, makgolo a robabongwe masome a robabobedi le motso ba British Airways ba neelwa konteraka ya go tsaya taolo ya difofane tse dingwaga di le thataro. Ka ngwaga wa sekete, makgolo a robabongwe masome a robabobedi le motso gape, Botswana Development Corporation e ne ya simolodisiwa ele bontlha bongwe jwa Air Botswana Holdings, mme ya neelwa marapo a go batla sefofane se se ka firisiwang. Sefofane sa Fokker F27 se ne sa tlhophiwa gape, mme ka lebaka la gore ba ne ba tlhaela babereki ba ba katisitsweng, ba ne ba thapa babereki ba Comair mme ba neela ba Safair Freighters konteraka ya go tlhokomela difofane. Ka ngwaga wa sekete, makgolo a robabongwe masome a robabobedi le boraro, sefofane sa Lockheed L-100-30 Hercules se ne sa firisiwa mme Air Botswana Cargo ya simolodisiwa go laola phiriso ya tse di tsayang dithoto. Mme e rile fa South African Airways e emisa ditirelo tsa yone kwa Lesotho le Swaziland, F27 ya bobedi ya rekiwa go isa ditlamelo kwa Maseru le Manzini. Sefofane sa Dornier 228-200 se se nang le ditilo di le lesome le borataro se ne sa firisiwa go tswa mo go ba Kalahari Air Service, ka kgwedi ya Morule a tlhola malatsi a le lesome ngwaga ya ngwaga wa sekete, makgolo a robabongwe masome a robabobedi le bone.[7] Sir Seretse Khama International Airport, e e lopileng madi a a kana ka di dikadike tsa di pula dile masome a matlhano le bosupa, e ne ya bulwa ka kgwedi ya Morule e tlhola malatsi a le lesome ka gwaga wa sekete, makgolo a robabongwe masome a robabobedi le bone, mme difofane tsa Air Botswana tsa simolola go dirisa maemelo a. [6]E rile ngwaga wa sekete, makgolo a robabongwe masome a robabobedi le borataro o ya fifing, difofane tsa simolola go oketsa ditsela mafelo a di yang ko go one a akaretsa Gaborone, Francistown, Johannesburg, Harare, Lusaka, Manzini, Maseru, Maun, Selebi-Phikwe le diphororo tsa Victoria.[7]

Koporase ya ga Puso

[fetola | Fetola Motswedi]

E ne ya re ka Kgwedi ya Moranang a tlhola gangwe, ka ngwaga wa sekete makgolo a robabongwe, masome a robabobedi le borobabobedi, Air Botswana ya tsewa ke puso ya Botswana go nna koporase e puso e nang le seabe mo go yone, ka fa tlase ga lephata la tsa Pereko, Dipalamo le Dipuisano, mo ele ka tetla ya molaomotheo wa Botswana wa ngwaga wa sekete makgolo a robabongwe, masome a robabobedi le borobabobedi,[8] mme ya nna yone e e letleletsweng go tsamaisa le go okamela mesepele ya difofane mo lefatsheng la Botswana. [9]E ntse ele ka Moranang ngwaga wa sekete makgolo a robabongwe, masome a robabobedi le borobabobedi, Air Botswana e ne ya nna kompone ya difofane yantlha mo Southern African Development Coordination Conference (SADCC) go nna le botsalano jwa tsa difofane le lefatshe la Namibia.[10]Ditirelo tsa Air Botswana di mo taolong ya lephata la Civil Aviation le le ka fa tlase ga molaomotheo wa Civil Aviation Act la ngwaga wa sekete makgolo a robabongwe, masome a supa le bosupa.[9]

Difofane tsa ATR 42-230 di le pedi di gorogile ka ngwaga wa sekete makgolo a robabongwe, masome a robabobedi le borobabobedi, mme morago ga rekisiwa sefofane sa Fokkers, sefofane sa BAe 146 sa ntlha se ne sa goroga ka ngwaga wa sekete makgolo a robabongwe, masome a robabobedi le borobabongwe ka kgwedi ya Ngwanatsele. Se ne sa simolola go bereka ka yone Kgwedi ya Ngwanatsele ele malatsi a le lesome le bobedi mo tseleng e e tswang Gaborone go ya Harare, e ne e bereka ga tlhano mo bekeng, mme e berekisana le difofane tsa lefatshe la Zimbabwe le mafelo a mangwe aa mo difofaneng tse di mo borwa jwa Aferika. Fa e ntse e gola, koporase e ne ya tsena mo lenaneong la go tshwarelela setilo le mafatshe a dichabachaba a akaretsa la British Caledonian, le le neng le na le ditilo mo difofaneng tse di tsamaelang tsela ya Lusaka go ya Gaborone.[7]

Ka kgwedi ya Moranang ngwaga wa sekete, makgolo a robabongwe, masome a robabongwe le bobedi, puso e ne ya tlhoma molao wa kiletso go goga motsoko, Air Botswana e nne ya nna yone kompone ya ntlha mo Botswana go tsibogela molao o ka go itsa go goga motsoko mo difofaneng tsotlhe tsa mo gae ka ngwaga wa sekete, makgolo a robabongwe, masome a robabongwe le boraro molao o ne wa atolosiwa mo difofaneng tsa mafatshe a a mo mokgatlhong wa borwa jwa Aferika (Southern African Development Community) ka ngwaga wa sekete,makgolo a robabongwe, masome a robabongwe le botlhano.[11] Le ntswa Air Botswana e ne ya itemogela tatlhegelo mo go tsa madi go tswa ka ngwaga wa 1988 go tsena ka 1993, ka ngwaga wa 1994 puso e ne ya fetolela ditatlhegelo tsa madi a ka nang ka di milione di le masome a supa le bone tsa dipula go a lekalekanya le dipoelo.[9]

Sefofane sengwe sa AirBotswana sa A2-ABR kwa Bonaero Park,South Africa

Tshenyego ya setlhopha sa difofane (1999)

[fetola | Fetola Motswedi]

Ka ngwaga wa sekete, makgolo a robabongwe, masome a robabongwe le borobabongwe, kgwedi ya Phalane e le malatsi a le lesome le bongwe, kompone e ne ya bona kgobalo fa mongwe wa bakgwetsi ba difofane tsa yone, Chris Phatswe, a ne a phatlakanya sefofane sa ATR 42 kwa Sir Seretse Khama International Airport, mo go neng ga baka tshenyo ya sefofane seo le difofane tse dingwe tse pedi tsa ATR 42.[12] [13] Phatswe o ne a gapa sefofane seo mo mosong, mme ya re a setse a le mo phefong a tlhagisa ba tora e e laolang mesepele ya difofane gore o na le maikaelelo a go ikgapela botshelo; [14]mme a kopa go bua le batho ba le mmalwa ka seromamowa, go akaretsa le Tautona Festus Mogae le moeteledipele wa kompone ya difofane. Ka Mogae a ne a seo mo lefatsheng la Botswana, dithulaganyo di ne tsa dirwa gore Phatswe a bue le mothusa Tautona Seretse Khama Ian Khama, [12]o a neng a supa keletso ya go bua le Phatswe.[13]

Morago ga gore sefofane se dikologe Gaborone dioura tse pedi, Phatswe o ne a se thudisa ka lobelo lwa 200 knots (370 km/h) mo difofaneng tse dingwe tse pedi tsa ATR 42, tse di neng di batlelwa mo phororong, a senya difofane tsotlhe tse tharo.[ Tiragalo e ne ya tlogela khamphane e na le BAe 146 e le nngwe fela, e e neng e sa kgone go dirisiwa ngwaga otlhe ka ntlha ya mathata a setegeniki, go pateletsa khamphane go hira sefofane go dira difofane tse di rulagantsweng. Go ne ga senolwa gore Phatswe o ne a kgaotswe ka ntlha ya mabaka a bongaka, a ganwa go busediwa gape mo tirong, mme a kgaolwa gape go fitlha ka Tlhakole ngwaga wa dikete pedi.[15]

Maiteko a go ikemela

[fetola | Fetola Motswedi]
Air Botswana ATR42-500 kwa maemelong a difofane a OR Tambo, kwa Johannesburg ka ngwaga wa dikete pedi le botlhano

Ka difofane tse di ne di itemogela tatlhegelo ya madi, e bontlha jwa yone e neng e le ka ntlha ya go dirisa babereki ba bantsi, go dirisa sefofane se segologolo se se sa tshwareng lookwane sentle, koketsego ya madi a tsamaiso, go tlhoka kitso ga baokamedi le go retelelwa ke go tshegetsa le go kgatlha bakgweetsi ba difofane ba ba rutegileng, puso e ne ya tlhopha Air Botswana go nna lephata la ntlha go nna mo mohameng o o ikemetseng. Madi a difofane di a dirisang, ga mmogo le tsamaiso ya boleng jo bo kwa tlase, go tlhoka go rekisa sentle, le go nna bonya go ikgolaganya le maranyane a masha, go thibela kgolo ya difofane.[16][17][18] Le fa go ntse jalo, mo dingwageng tse tlhano pele ga ngwaga wa dikete pedi le boraro, puso e ne e ise ke e tlhoke go fokotsa madi a Air Botswana, mo dingwageng tse tlhano tse di fitileng e ne e dirile dipoelo.

Tsamaiso ya gore e nne mo mohameng o o ikemetseng e simologile ka Moranang a le lesome le borobabongwe ngwaga wa dikete pedi, fa puso e baya monwana tumalano le koporase ya mafatshefatshe ya madi e e ikgolagantseng le World Bank, e e neng ya baka gore IFC e thapiwe e le mogakolodi wa puso mo tsamaisong e.[19]

Ka ngwaga wa dikete pedi, le boraro, puso e ne ya leka go dira gore difofane tse di nne mo mohameng o o ikemetseng, Air Mauritius le Comair e ne ya nna bapati. Tsamaiso e ka bo e bone mofenyi a amogela masome a mane mo lekgolong mo Air Botswana, puso e tshwere masome a mane mo lekgolong a mangwe, fa babereki ba tshwara lesome le le setseng.[20] Go ne go rulagantswe gore fa difofane di sena go itshetlela mo beng ba tsone ba basha, di tlaa kwalwa mo Botswana Stock Exchange.[21] Air Mauritius e ne ya ikgogela morago mo tsamaisong e ka Lwetse ngwaga wa dikete pedi le boraro. Comair e ne ya ikgogela morago ka Morule ngwaga wa dikete pedi le boraro, e le ka ntlha ya go oketsega ga go phadisana le difofane tse di tlhwatlhwa tlase mo mmarakeng wa Aforika Borwa. Puso e ne ya emisa go batla mopati ka Tlhakole ngwaga wa dikete pedi le bone.[22][23]

Mokgatlho wa Teemane

[fetola | Fetola Motswedi]

Mokgatlho wa Teemane wa Air Botswana o ikaeletse go go duela le go go leboga ka ntlha ya boikanyego ba gago. Iponele dikilometara mo setilong sengwe le sengwe se se leng teng mo sefofaneng sengwe le sengwe sa Air Botswana se se nang le thekete le se se dirisiwang, nako le nako fa o tlhopha go fofa le rona. Maloko a a letleletsweng ke naga nngwe le nngwe e mo go yone dithulaganyo tse di ntseng jalo di leng kafa molaong, di sa duelelwe e bile go se na madi a go ikwadisa kgotsa a ngwaga le ngwaga.

Metswedi

[fetola | Fetola Motswedi]
  1. ↑ "Air Botswana in Gaborone, Botswana". airlines-airports.com. retrieved 2020-05-30
  2. ↑ Birns, Hilka (2 April 2025). "Air Botswana still trying to sell last ATR42-500". www.ch-aviation.com.
  3. ↑ "Contact us." Air Botswana. Retrieved on 21 June 2010. "HEAD-OFFICE Sir Seretse Khama Airport PO Box 92 Gaborone Tel:(+267) 3688400 Fax"
  4. ↑ reporter, Portia Nkani-BG, "PEEPA calls for privatisation of Air Botswana - Botswana Guardian". www.botswanaguardian.co.bw. Retrieved 2020-05-29.
  5. ↑ Molwelwa, Onalenna (February 2011). "The Future of National Flag Carriers in developing Countries: Air Botswana's Privatisation Struggle". Retrieved 30 May 2020
  6. 1 2 Dale,Richard (1995)."Botswana's search for autonomy in southern Africa".Greenwood Publishing Group. pp. 102–105, 108. ISBN 0-313-29571-9. Retrieved 14 October 2009
  7. 1 2 3 4 5 Guttery, Ben R. (1998). "Encyclopedia of African airlines" Ben Guttery. pp. 24–26, ISBN 0-7864-0495-7. Retrieved 14 October 2009
  8. ↑ Nagel, Stuart S. (2000). "Critical issues in cross-national public administration: privatization, democratization, decentralization". Greenwood Publishing Group. p.30. ISBN 9781567202991.Retrieved 14 October 2009
  9. 1 2 3 Kaboyakgosi,Gape.(April 2003) "Air and Road Transport in Botswana" . Gaborone. Botswana Institute for Development Policy Analysis. Retrieved 18 October 2009
  10. ↑ Kalley, Jacqueline Audrey; Schoeman, Elna, Andor; Lydia Eve (1999). "Southern African political history: a chronology of key political events from independence to mid-1997" . Greenwood Publishing Group. p. 106. ISBN 0-313-30247-2 . Retrieved 14 October 2009
  11. ↑ Mbongwe, Bontle. "Country report on tobacco advertising and promotion ban – Botswana" (PDF). Gaborone: World Health Organization. p. 3. Retrieved 16 July 2026
  12. 1 2 "Criminal Occurrence description" . Aviation Safety Network. 18 November 2005. Retrieved 15 October 2009.
  13. 1 2 "AB plunged into crisis Pilot destroys aircraft in suicide crash". Botswana Press Agency. 12 October 1999. Archived from the original on 27 April 2006. Retrieved 15 October 2009
  14. ↑ "Suicide pilot destroys Air Botswana fleet" . BBC News. 11 October 1999. Retrieved 11 October 1999
  15. ↑ "Criminal Occurrence description". Aviation Safety Network. 18 November 2005. Retrieved 16 July 2026
  16. ↑ African Development Bank (2009). "Botswana". African Economic Outlook 2008. Paris: OECD Publishing. p. 161. ISBN 978-92-64-04585-9. Retrieved 15 July 2026
  17. ↑ "Airlink still in running to buy stake in Air Botswana". Johannesburg: Mmegi. 12 April 2007. Archived from the original on 23 February 2012. Retrieved 16 July 2026
  18. ↑ Monnane, Monnane; Sesinyi, Magdeline (April 2001). "Measures Affecting Trade in Services in Botswana" (PDF). Gaborone: Botswana Institute for Development Policy Analysis. p. 4. Archived from the original (PDF) on 23 December 2004. Retrieved 16 July 2026
  19. ↑ "Government to be majority shareholder in privatisation of Air Botswana". Botswana Press Agency. 21 July 2000. Archived from the original on 10 February 2005. Retrieved 16 July 2026
  20. ↑ "Air Botswana privatisation to go on". Botswana Press Agency. 8 October 2003. Archived from the original on 10 February 2005. Retrieved 16 July 2026
  21. ↑ "AB privatisation race to end". Botswana Press Agency. 21 January 2004. Archived from the original on 3 October 2006. Retrieved 16 July 2026
  22. ↑ "Search for Air Botswana partners suspended". Associated Press. 3 February 2004. Retrieved 16 July 2026
  23. ↑ Mokgoabone, Kabo; Malema, Prof (2 February 2004). "Comair Pull-Out Stalls AB Privatisation Process". Mmegi. Archived from the original on 23 February 2012. Retrieved 16 July 2026
Retrieved from "https://tn.wikipedia.org/w/index.php?title=Air_Botswana&oldid=52606"